கோவை பெண் ஓட்டுநருக்கு வானதி சீனிவாசன் நேரில் வாழ்த்து

கோவை: கோவையில் தனியார் நகர பேருந்தை இயக்கிவரும் ஓட்டுநர் ஷர்மிளா பலரது பாராட்டை பெற்று வருகிறார்.

இந்நிலையில், பாஜக தேசிய மகளிர் அணி தலைவரும், கோவை தெற்கு சட்டப்பேரவை உறுப்பினருமான வானதி சீனிவாசன் ஷர்மிளா இயக்கும் பேருந்தில் நேற்று முன்தினம் பயணம் மேற்கொண்டார். காந்திபுரம் முதல் ஹோப் காலேஜ் வரை பயணித்த அவர், ஷர்மிளாவுக்கு வாழ்த்துகளை தெரிவித்து, சிறிது நேரம் கலந்துரையாடினார்.

பின்னர் வானதி சீனிவாசன் கூறும்போது, “ஷர்மிளாவை நேரில் சந்தித்து வாழ்த்து தெரிவிக்க வேண்டும் என எண்ணி இருந்தேன். நேரம் கிடைத்தவுடன் அதே பேருந்தில் பயணித்து அவருக்கு வாழ்த்துகளை தெரிவித்தேன். பெண் ஓட்டுநராக இருக்கும் பேருந்தில் பயணிப்பது மகளிர் அணி தலைவியாக பெருமிதமாக உள்ளது”என்றார்.