ஆஷஸ் 2023 | ஹாரி புரூக், கிறிஸ் வோக்ஸ் அசத்தல்: ஆஸி.யை வீழ்த்தியது இங்கிலாந்து

லீட்ஸ்: ஆஸ்திரேலிய அணிக்கு எதிரான ஆஷஸ் டெஸ்ட் கிரிக்கெட் தொடரின் 3-வது ஆட்டத்தில் இங்கிலாந்து அணி 3 விக்கெட்கள் வித்தியாசத்தில் வெற்றி பெற்றது.

ஹெட்டிங்லியில் நடைபெற்று வந்த இந்த போட்டியில் முதல் இன்னிங்ஸில் ஆஸ்திரேலியா 263 ரன்களும், இங்கிலாந்து 237 ரன்களும் எடுத்தன. 26 ரன்கள் முன்னிலையுடன் 2-வது இன்னிங்ஸை விளையாடிய ஆஸ்திரேலிய அணி 3-வது நாள் ஆட்டத்தில் 67.1 ஓவர்களில் 224 ரன்களுக்கு அனைத்து விக்கெட்களையும் இழந்தது. அதிகபட்சமாக டிராவிஸ் ஹெட் 112 பந்துகளில், 3 சிக்ஸர்கள், 7 பவுண்டரிகளுடன் 77 ரன்கள் சேர்த்தார்.

251 ரன்கள் இலக்குடன் பேட் செய்த இங்கிலாந்து அணி 3-வது நாள் ஆட்டத்தின் முடிவில் 5 ஓவர்களில் விக்கெட் இழப்பின்றி 27 ரன்கள் எடுத்திருந்தது. ஸாக் கிராவ்லி 9, பென் டக்கெட் 18 ரன்களுடன் ஆட்டமிழக்காமல் இருந்தனர். நேற்று 4-வது நாள் ஆட்டத்தை இங்கிலாந்து அணி தொடர்ந்து விளையாடியது. பென் டக்கெட் 23 ரன்கள் எடுத்த நிலையில் மிட்செல் ஸ்டார்க் பந்தில் எல்பிடபிள்யூ ஆனார்.

இதையடுத்து களமிறங்கிய மொயின் அலி 5 ரன்களில் போல்டானார். நிதானமாக விளையாடிய ஸாக் கிராவ்லி 55 பந்துகளில், 5 பவுண்டரிகளுடன் 44 ரன்கள் எடுத்த நிலையில் மிட்செல் மார்ஷ் பந்தில் விக்கெட்டை பறிகொடுத்தார். ஜோ ரூட் 21, பென் ஸ்டோக்ஸ் 13, ஜானி பேர்ஸ்டோ 5 ரன்களில் நடையை கட்டினர். 171 ரன்களுக்கு 6 விக்கெட்களை இழந்த நிலையில் ஹாரி புரூக், கிறிஸ் வோக்ஸ் ஜோடி அணியை வெற்றிப் பாதைக்கு அழைத்துச் சென்றது.

தனது 5-வது அரை சதத்தை அடித்த ஹாரி புரூக் 93 பந்துகளில், 9 பவுண்டரிகளுடன் 75 ரன்கள் எடுத்த நிலையில் மிட்செல் ஸ்டார்க்பந்தை மிட் ஆஃப் திசையில் தூக்கி அடித்தபோது பாட் கம்மின்ஸிடம் கேட்ச் ஆனது. 7-வது விக்கெட்டுக்கு கிறிஸ்வோக்ஸுடன் இணைந்து ஹாரிபுரூக் 59 ரன்கள் சேர்த்திருந்தார். அந்த நேரத்தில் இங்கிலாந்து அணியின் வெற்றிக்கு 21 ரன்கள் தேவையாக இருந்தது.

இதையடுத்து களமிறங்கிய மார்க்வுட் 8 பந்துகளில், தலா ஒரு சிக்ஸர், பவுண்டரியுடன் 16 ரன்கள் விளாச இங்கிலாந்து அணி 50 ஓவர்களில் 7 விக்கெட்கள் இழப்புக்கு 254 ரன்கள் எடுத்து வெற்றி பெற்றது. கிறிஸ் வோக்ஸ் 47 பந்துகளில், 4 பவுண்டரிகளுடன் 32 ரன்கள் சேர்த்து ஆட்டமிழக்காமல் இருந்தார். ஆஸ்திரேலிய அணி தரப்பில் மிட்செல் ஸ்டார்க் 5 விக்கெட்கள் வீழ்த்தினார்.

3 விக்கெட்கள் வித்தியாசத்தில் வெற்றி பெற்ற இங்கிலாந்து அணி 5 ஆட்டங்கள் கொண்ட ஆஷஸ் டெஸ்ட் கிரிக்கெட் தொடரைஉயிர்ப்பிப்புடன் வைத்துள்ளது. முதல் இரு ஆட்டங்களிலும் ஆஸ்திரேலிய அணி வெற்றி கண்டிருந்தது. 4-வது போட்டி வரும் 19-ம் தேதி மான்செஸ்டர் நகரில் தொடங்குகிறது.