உதகையில் பணியின்போது மாரடைப்பால் சிறப்பு காவல் உதவி ஆய்வாளர் உயிரிழப்பு

உதகை: நீலகிரி மாவட்டம் உதகை ஊரக காவல் நிலையத்தில் சிறப்பு காவல் உதவி ஆய்வாளராக (எஸ்.எஸ்.ஐ) பணிபுரிந்தவர் கோவிந்தராஜ் (59). இவர், நேற்றுமுன்தினம் இரவு பணியின் போது மாரடைப்பால் உயிரிழந்தார்.

இவரது உடல், பிரேத பரிசோதனைக்காக உதகை அரசு தலைமை மருத்துவமனையில் வைக்கப்பட்டுள்ளது. இவருக்கு மனைவி மற்றும் இரண்டு பெண் குழந்தைகள் உள்ளனர். இவரது சொந்த ஊர் கோவை மாநகரிலுள்ள சிங்காநல்லூர். இவர், கோவை பட்டாலியனிலும் பணிபுரிந்துள்ளார். இறுதியாக, கோவை செல்வபுரம் காவல் நிலையத்தில் பணிபுரிந்தார்.

இந்நிலையில், கடந்த வாரம் அங்கிருந்து உதகை ஊரக காவல் நிலையத்துக்கு பணியிடமாற்றம் செய்யப்பட்டுள்ளார். விருப்ப ஓய்வு கோரிய நிலையில், நேற்று முன்தினம் இரவு அவர் தங்கியிருந்த வீட்டில் மாரடைப்பால் திடீரென உயிரிழந்தார்.