3 மண்டலங்களில் 23-ம் தேதி குடிநீர் விநியோகம் நிறுத்தம்

சென்னை: சென்னை குடிநீர் வாரியம் வெளியிட்ட செய்திக்குறிப்பு: சென்னை மெட்ரோ ரயில் நிறுவனத்தால் தேனாம்பேட்டை மண்டலம் வெங்கட்நாராயணா சாலை மற்றும் சேமியர்ஸ் சாலையில் குடிநீர் குழாய் இணைப்புப் பணிகள் மேற்கொள்ளப்பட உள்ளன. இதனால், ஜன. 23-ம் தேதி காலை 6 முதல் 24-ம் தேதி காலை 6 மணி வரை, தேனாம்பேட்டை, கோடம்பாக்கம், அடையார் ஆகிய மண்டலங்களில் குழாய்கள் மூலம் வழங்கப்படும் குடிநீர் விநியோகம் நிறுத்தப்படுகிறது.

எனவே, பொதுமக்கள் முன்னெச்சரிக்கையாக, வேண்டிய அளவு குடிநீரை சேமித்து வைத்துக்கொள்ள வேண்டும். அவசரத் தேவைக்கு லாரிகள் மூலம் குடிநீர் பெறுவதற்கு வாரியத்தின் https://cmwssb.tn.gov.in என்ற இணையதள முகவரியை பயன்படுத்தி பதிவு செய்து கொள்ளலாம். மேலும், குடிநீர் இணைப்பு இல்லாத பகுதிகள், அழுத்தம் குறைவான பகுதிகளுக்கு குடிநீர் தொட்டிகள் மற்றும் லாரிகள் மூலம் வழங்கப்படும் குடிநீர் விநியோகம் எந்தவித தடையுமின்றி வழக்கம்போல் சீரான முறையில் மேற்கொள்ளப்படும்.