டேபிள் டென்னிஸில் தமிழக ஜோடிக்கு தங்கம்

சென்னை: மாநிலங்களுக்கு இடையிலான 84-வது இளையோர் மற்றும் ஜூனியர் தேசிய சாம்பியன்ஷிப் டேபிள் டென்னிஸ் போட்டி கடந்த 8-ம் தேதி முதல் சென்னை நேரு உள் விளையாட்டரங்கில் நடைபெற்றது.

இதன் இறுதி நாளான நேற்று ஆடவருக்கான யு-19 ஒற்றையர் பிரிவில் இறுதி ஆட்டத்தில் டெல்லி வீரர் பயாஸ்ஜெயின் 13-11, 11-6, 11-7, 8-11,11-4 என்ற செட் கணக்கில் உத்தரபிரதேசத்தின் திவ்யான்ஷ் ஸ்ரீவஸ்தவாவை வீழ்த்தி சாம்பியன் பட்டம் வென்றார். தங்கபதக்கத்துடன் அவருக்கு ரூ.72 ஆயிரம் பரிசுத் தொகை வழங்கப்பட்டது. முன்னதாக நடைபெற்ற அரை இறுதி ஆட்டத்தில் தமிழகத்தின் பிரேயேஷ் ராஜ் 8-11,7-11,11-7,13-15,11-8,11-9,8-11 என்ற செட் கணக்கில் திவ்யான்ஷ் வஸ்தவாவிடம் தோல்வி கண்டார்.

யு-19 ஆடவர் இரட்டையர் பிரிவு இறுதி ஆட்டத்தில் தமிழகத்தின் வருண் கணேஷ், பிரேயேஷ் ராஜ் ஜோடி 11-7, 11-9, 11-6 என்ற நேர் செட்டில் மேற்கு வங்கத்தின் அங்கூர் பட்டாசார்ஜி, சவுமியாதீப் சர்க்கார் ஜோடியை வீழ்த்தி தங்கப் பதக்கம் வென்றது.

அதேவேளையில் யு-17 ஆடவர் இரட்டையர் பிரிவு இறுதிஆட்டத்தில் தமிழகத்தின் முத்துராஜசேகரன், பிரேயேஷ் ராஜ் ஜோடி 10-12, 9-11, 5-11 என்ற செட்கணக்கில் மேற்கு வங்கத்தின் அங்கூர் பட்டாசார்ஜி, புனித் பிஸ்வாஸ் ஜோடியிடம் தோல்வி அடைந்து வெள்ளிப் பதக்கம்பெற்றது. வெற்றி பெற்றவர்களுக்கு ஜி.சத்தியன், எம்.எஸ்.மைதிலி ஆகியோர் பரிசுகளை வழங்கினர்.