திருவண்ணாமலை | 6 டன் ரேஷன் அரிசி கடத்திய 4 பேர் கைது

திருவண்ணாமலை: திருவண்ணாமலை அருகே 3 சரக்கு வாகனங்களில் நாமக்கல்லுக்கு 6 டன் ரேஷன் அரிசியை கடத்த முயன்ற 4 பேர் கைது செய்யப்பட்டனர்.

திருவண்ணாமலை மாவட்டம் வெறையூர் அடுத்த கொளக்குடி கிராமத்தில் ரேஷன் அரிசியை பதுக்கி வைத்து, நாமக்கல் மாவட்டத்துக்கு சரக்கு வாகனங்களில் கடத்தி செல்ல இருப்பதாக வெறையூர் காவல்துறைக்கு நேற்று முன் தினம் நள்ளிரவு தகவல் கிடைத்தது.

அதன்பேரில், கொளக்குடி கிராமத்தில் வெறையூர் காவல் துறையினர் சோதனை நடத்தியுள்ளனர். அப் போது, சந்தேகிக்கும்படி நிறுத்தி வைக்கப்பட்டிருந்த 3 சரக்கு வாகனங்களை சோதனையிட்டதில், 6 டன் ரேஷன் அரிசி மூட்டைகள் இருந்தது தெரியவந்தது. இதை யடுத்து 3 வாகனங்களில் இருந்த 4 பேரை பிடித்து விசாரணை நடத்தினர்.

அதில், தி.மலை திருவள்ளுவர் தெருவில் வசிக்கும் பிச்சாண்டி(46) என்பவர் ரேஷன் அரிசி மூட்டைகளை பதுக்கி வைத்து கடத்தி வந்ததும், கீழ்பென்னாத்தூர் அடுத்த கழிக்குளம் கிராமத்தைச் சேர்ந்த சிவா (24), தி.மலை அடுத்த சோ.கீழ்நாச்சிப்பட்டு கிராமத்தைச் சேர்ந்த மயில்சாமி(38), ஆனந்தன்(32) ஆகியோர் சரக்கு வாகன ஓட்டுநர் என்பது தெரியவந்தது. இதையடுத்து 6 டன் ரேஷன் அரிசி, 3 சரக்கு வாகனங்கள் மற்றும் பிடிபட்ட 4 பேரையும் தி.மலை மாவட்ட குடிமைப் பொருள் கடத்தல் தடுப்பு பிரிவிடம் வெறையூர் காவல்துறையினர் ஒப்படைத்தனர்.

இதையடுத்து அவர் கள் வழக்குப்பதிவு செய்து 4 பேரையும் கைது செய்தனர். மேலும் 6 டன் அரிசி மற்றும் கடத்தலுக்கு பயன்படுத்தப்பட்ட 3 சரக்கு வாகனங்களை பறிமுதல் செய்தனர்.