’ஜெயிலர் 2’ படத்தில் ரஜினியுடன் நடித்த அனுபவங்களை பகிர்ந்துள்ளார் சுராஜ் வெஞ்சரமுடு.
நெல்சன் இயக்கத்தில் உருவாகி வரும் ‘ஜெயிலர் 2’ படத்தின் இறுதிகட்டப் படப்பிடிப்பு மட்டும் பாக்கியிருக்கிறது. இதில் ரஜினியுடன் இணைந்து முதன்முறையாக நடித்துள்ளார் சுராஜ் வெஞ்சரமுடு. தற்போது ‘யூத்’ படத்தில் கென் கருணாஸுக்கு அப்பாவாக முக்கிய கதாபாத்திரத்தில் நடித்துள்ளார்.
‘யூத்’ படத்தினை விளம்பரப்படுத்த சுராஜ் வெஞ்சரமுடு பேட்டியொன்று அளித்துள்ளார். அதில் ‘ஜெயிலர் 2’ படத்தில் ரஜினியுடன் நடித்த அனுபவங்களை பகிர்ந்துள்ளார். அப்பேட்டியில், “’ஜெயிலர் 2’ படம் மிகவும் அற்புதமாக வந்துள்ளது. முதல் பாகத்தினை ஒப்பிடும் போது, இரண்டாம் பாகம் இன்னும் அற்புதமாக இருக்கும்.
ரஜினி சாருடன் நடிக்க வாய்ப்பு கிடைக்கும் என்று நான் நினைத்தது கூட இல்லை. ஒவ்வொரு காட்சியிலும் அவர் ஆச்சரியப்பட வைப்பார். உண்மையிலேயே அவர் ஒரு மேஜிசியன் தான். தமிழில் ஒரு சரியான படம் என்று காத்திருந்தேன். ’வீர தீர சூரன்’ அமைந்ததில் மகிழ்ச்சி. இப்போது ‘யூத்’, ‘கரா’ மற்றும் ‘ஜெயிலர் 2’ ஆகிய படங்களில் நடித்து முடித்துள்ளேன்” என்று தெரிவித்துள்ளார் சுராஜ் வெஞ்சரமுடு.
