மீண்டும் கமலுடன் இணையும் வடிவேலு?

கமல் இயக்கி நடிக்கவுள்ள 'தலைவன் இருக்கின்றான்' படத்தில் வடிவேலுவை நடிக்க வைக்கப் பேச்சுவார்த்தை தொடங்கப்பட்டுள்ளது.

ஷங்கர் இயக்கத்தில் உருவாகும் 'இந்தியன் 2' படத்தில் கவனம் செலுத்தி வருகிறார் கமல். இதன் படப்பிடிப்பு ராஜமுந்திரியில் உள்ள சிறைச்சாலையில் தற்போது நடைபெற்று வருகிறது. வார இறுதி நாட்களில் 'பிக் பாஸ்' நிகழ்ச்சிக்காக மட்டும் சென்னை வந்து செல்கிறார் கமல்.

காஜல் அகர்வால், ரகுல் ப்ரீத் சிங், சித்தார்த், ப்ரியா பவானி சங்கர், விவேக், நெடுமுடி வேணு உள்ளிட்ட பலர் கமலுடன் நடித்து வருகிறார்கள். லைகா நிறுவனம் பெரும் பொருட்செலவில் தயாரித்து வரும் இப்படத்தை முடித்துவிட்டு, மீண்டும் லைகா நிறுவனத்துக்கே தனது அடுத்த படத்துக்கான கால்ஷீட்டையும் கொடுத்துள்ளார் கமல்.

அந்தப் படத்தை கமலே இயக்கி, நடிக்கவுள்ளார். ஏ.ஆர்.ரஹ்மான் இசையமைக்கவுள்ளார். நீண்ட நாட்களாகத் தான் வைத்திருந்த 'தலைவன் இருக்கின்றான்' படத்தை இம்முறை மீண்டும் கையில் எடுத்துள்ளார் கமல். இந்தப் படத்தில் கமலுடன் நடிக்க வடிவேலுவிடம் பேச்சுவார்த்தை நடத்தியுள்ளது படக்குழு. 'சிங்காரவேலன்','தேவர் மகன்', 'காதலா காதலா' ஆகிய படங்களைத் தொடர்ந்து கமல் - வடிவேலு இணைந்து நடிக்கும் படமாக இது உருவாகவுள்ளது.

'இம்சை அரசன் 24-ம் புலிகேசி' படத்துக்காக வடிவேலுவிடம் கொடுத்த அட்வான்ஸ் தொகை திரும்ப வாங்கவில்லை. இந்தப் படத்தை முதல் பிரதி அடிப்படையில் தயாரித்தது லைகா நிறுவனம். இதனால் அந்தத் தொகையை ஈடுகட்ட 'தலைவன் இருக்கின்றான்' படத்துக்காக அவரிடம் பேச்சுவார்த்தை நடத்தியுள்ளது குறிப்பிடத்தக்கது.

'இம்சை அரசன் 24-ம் புலிகேசி' படத்திலிருந்து வடிவேலு விலகியுள்ளதால், இயக்குநர் சிம்புதேவன் வேறொரு நாயகனிடம் பேச்சுவார்த்தை நடத்தி வருகிறார்.