கோவாவில் 10, 12-ம் வகுப்பு பொதுத் தேர்வுகள் தள்ளிவைப்பு; 8-ம் வகுப்பு வரை அனைவருக்கும் தேர்ச்சி 

கோவாவில் 10, 12-ம் வகுப்புப் பொதுத்தேர்வுகள் உட்பட 9-ம் வகுப்பு முதல் 12-ம் வகுப்பு வரை அனைத்துத் தேர்வுகளும் தள்ளி வைக்கப்படுவதாகவும் 8-ம் வகுப்பு வரை தேர்வு இல்லாமலே தேர்ச்சி அளிப்பதாகவும் அறிவிக்கப்பட்டுள்ளது.

கரோனா வைரஸ் பரவலில் இந்தியா தற்போதும் 2-ம் கட்டத்தில் இருப்பதால், அதற்குள் கட்டுப்படுத்த மத்திய அரசு தீவிரமான முயற்சிகளை எடுத்து வருகிறது. பள்ளி, கல்லூரிகளுக்கு மார்ச் 31-ம் தேதி வரை விடுமுறை அறிவிக்கப்பட்டுள்ளது.

சிபிஎஸ்இ மற்றும் ஐசிஎஸ்இ பொதுத்தேர்வுகள் காலவரையரையின்றி ஒத்திவைக்கப்பட்டுள்ளன. இந்நிலையில் கோவா மாநிலத்தில் 10, 12-ம் வகுப்புப் பொதுத்தேர்வுகள் தள்ளி வைக்கப்பட்டுள்ளன.

இதுகுறித்து மாநில பள்ளிக் கல்வித்துறை இயக்குநர் வந்தனா ராவ் வெளியிட்டுள்ள அறிக்கையில், ''மறு உத்தரவு வரும் வரை அனைத்துத் தேர்வுகளும் ஒத்தி வைக்கப்படுகின்றன. கரோனா பரவலை அடுத்து 10, 12-ம் வகுப்புப் பொதுத் தேர்வுகள் உட்பட 9 முதல் 12-ம் வகுப்பு வரை அனைத்துத் தேர்வுகளும் தள்ளி வைக்கப்படுகின்றன.

ஏற்கெனவே 8-ம் வகுப்பு வரை அனைத்து மாணவர்களுக்கும் தேர்வுகள் ரத்து செய்யப்பட்டன. அவர்களுக்குத் தேர்வு இல்லாமலே தேர்ச்சி அளிக்கப்படும் என்று அறிவிக்கப்பட்டிருந்தது'' என்று தெரிவிக்கப்பட்டுள்ளது.

கோவாவில் கரோனா வைரஸால் இதுவரை யாரும் பாதிக்கப்படவில்லை என்பது குறிப்பிடத்தக்கது.