உதகை தாவரவியல் பூங்காவுக்கான நுழைவுக் கட்டணம் ரூ.125 ஆக குறைப்பு

உதகை: உதகை அரசு தாவரவியல் பூங்காவில் மலர்க் கண்காட்சி நடைபெற்றுவரும் நிலையில், சுற்றுலா பயணிகளுக்கான நுழைவுக் கட்டணம் ரூ.150-ல் இருந்து ரூ.125-ஆக குறைக்கப்பட்டுள்ளதாக தோட்டக்கலைத் துறை அதிகாரிகள் தெரிவித்தனர்.

இதுதொடர்பாக அவர்கள் கூறியதாவது: நீலகிரி மாவட்டம் உதகையில் கடந்த 10-ம் தேதி மலர்க் கண்காட்சி மற்றும் ரோஜா கண்காட்சி தொடங்கியது. தாவரவியல் பூங்காவில் மலர் மாடங்களில் அடுக்கி வைக்கப்பட்டுள்ள 65 ஆயிரம் மலர்த் தொட்டிகளில் பூத்துக்குலுங்கும் வண்ணமயமான மலர்கள் பார்வையாளர்களை கவர்ந்து வருகின்றன.

இதுதவிர 2 லட்சம் கார்னேஷன் மலர்களைக் கொண்டு வடிவமைக்கப்பட்டுள்ள மலை ரயில், டிஸ்னி வேர்ல்டு மற்றும் பல்வேறு மலர் அலங்காரங்களும் சுற்றுலா பயணிகளை கவர்ந்து வருகின்றன.

கண்காட்சி தொடங்கி 5 நாட்களான நிலையில், குறைந்த அளவிலான சுற்றுலா பயணிகளே கண்காட்சியை பார்வையிட்டுள்ளனர். அதிகபட்சமாக கடந்த 12-ம் தேதி 21 ஆயிரம் பேர் வந்திருந்தனர். பிற நாட்களில், இதைவிட குறைவான பார்வையாளர்களே வந்துள்ளனர்.

சுற்றுலா பயணிகள் வருகையை அதிகரிக்கும் வகையில், மலர்க் கண்காட்சிக்கான நுழைவுக் கட்டணம் குறைக்கப்பட்டுள்ளது. பெரியவர்களுக்கு ரூ.150-ஆக இருந்த நுழைவுக் கட்டணம் ரூ.125 ஆக குறைக்கப்பட்டுள்ளது. சிறியவர்களுக்கு ரூ.75 என்ற பழைய கட்டணமே தொடர்கிறது. இவ்வாறு அவர்கள் கூறினர்.

இதுகுறித்து உதகை வியாபாரிகள் சங்க மாவட்ட நிர்வாகி பரூக் கூறியதாவது: ஒவ்வோர் ஆண்டும் கோடை விழாவைக் காண லட்சக்கணக்கான சுற்றுலா பயணிகள் திரள்வது வழக்கம். அப்போது, வியாபாரம் களைகட்டும்.

இந்தாண்டு அமல்படுத்தப்பட்டுள்ள இ-பாஸ் நடைமுறையால் நீலகிரிக்கு வரும் சுற்றுலா பயணிகளின் எண்ணிக்கை குறைந்துவிட்டது. தமிழகத்தில் உள்ளவர்களுக்கு எளிதாக இ-பாஸ் கிடைத்து விடுகிறது.

வெளி மாநில சுற்றுலா பயணிகளுக்கு விண்ணப்பித்த உடன் இ-பாஸ் கிடைப்பதில்லை. பலமுறை முயற்சி செய்த பின்னரே இ-பாஸ் கிடைப்பதாக கவலை தெரிவித்தனர். அதனால், சுற்றுலா பயணிகள் நீலகிரி மாவட்டத்துக்கு வருவதை தவிர்த்து வருகின்றனர். இதனால் உதகையில் சுற்றுலாவை நம்பியுள்ள ஏராளமான தொழில்கள் பாதிக்கப்பட்டுள்ளன, என்றார்.