பிப்ரவரி 17 முதல் 3 நாட்கள் தென்மாவட்டங்களில் முதல்வர் பிரச்சாரம்

தூத்துக்குடி: முதல்வர் பழனிசாமி வரும் 17-ம் தேதி தூத்துக்குடி மாவட்டத்தில் 4 தொகுதிகளில் பிரச்சாரம் மேற்கொள்கிறார்.

இது தொடர்பாக, அமைச்சர் கடம்பூர் ராஜு கூறியதாவது: வரும் 16-ம் தேதி முதல்வர் பழனிசாமி பதவியேற்று 4 ஆண்டுகள் நிறைவடைந்து, 5-ம் ஆண்டு தொடங்குகிறது. இந்த 4 ஆண்டுகளில் அனைத்து துறைகளிலும் தமிழகம் முதல் மாநிலமாக பல்வேறு விருதுகளைப் பெற்று, சாதனை படைத்துள்ளது.

வரும் 17-ம் தேதி காலை முதல்வர் பழனிசாமி விமானம் மூலம் தூத்துக்குடி வருகிறார். அன்று தூத்துக்குடி, திருச்செந்தூர், வைகுண்டம், ஓட்டப்பிடாரம் தொகுதிகளில் முதல்கட்ட பிரச்சாரம் மேற்கொள்கிறார். இதைத் தொடர்ந்து 18, 19-ம் தேதிகளில் திருநெல்வேலி மாவட்டத்தில் பிரச்சாரம் செய்கிறார்.

விவசாயிகளின் கூட்டுறவு கடன் ரூ.12,110 கோடியை முதல்வர் தள்ளுபடி செய்துள்ளார். இதுபோல இன்னும் பல திட்டங்கள் வரவிருக்கின்றன என்றார்.