பாலக்கோடு அரசுப் பள்ளி ஆசிரியருக்கு கரோனா 42 மாணவிகள் தனிமைப்படுத்தப்பட்டனர்

தருமபுரி மாவட்டம் பாலக்கோடு அரசு பெண்கள் மேல்நிலைப் பள்ளியில் 10-ம் வகுப்புக்கான ஆசிரியராக 56 வயதுள்ள பெண் பணியாற்றி வருகிறார். இவர், கடந்த 22, 23 ஆகிய தேதிகளில் உடல் நலக் குறைவு காரணமாக பள்ளிக்கு வரவில்லை.

இதற்கிடையில் அவருக்கு மேற்கொள்ளப்பட்ட மருத்துவப் பரிசோதனை முடிவில், கரோனா தொற்று ஏற்பட்டிருப்பது கடந்த 24-ம் தேதி உறுதி செய்யப்பட்டது. அதைத் தொடர்ந்து அவர் கோவையில் உள்ள தனியார் மருத்துவமனையில் சிகிச்சைக்கு சேர்க்கப்பட்டுள்ளார்.

இந்நிலையில், அவரது வகுப்பு மாணவியர் 42 பேரை 25-ம் தேதி முதல் 29-ம் தேதி வரை வீட்டிலேயே தனிமைப்படுத்திக் கொள்ள பள்ளி நிர்வாகம் வலியுறுத்தி உள்ளது. இதுதவிர, இப்பள்ளியில் பணியாற்றும் 45 ஆசிரியர்களுக்கு கரோனா தொற்று அறியும் பரிசோதனைக்கான மாதிரி சேகரிக்கப்பட்டுள்ளது.