புதுச்சேரியில் தொடர்ந்து அதிகரிக்கும் கரோனா ஒரே மாதத்தில் 401 பேர் உயிரிழப்பு :

புதுச்சேரியில் கரோனா தொற்று பாதிப்பு கடந்த ஒரு மாதத்தில் முன் எப்போதும் இல்லாத அளவுக்கு அதிகரித்துள்ளது. கடந்த ஏப்ரல் 14-ம் தேதி 3,032 ஆக இருந்த கரோனா பாதிப்பு, மே 14-ம் தேதியன்று 17,424 ஆக உயர்ந்துள்ளது. குறிப்பாக கடந்த ஒரு மாதத்தில் 401 பேர் உயிரிழந்து உள்ளனர்.

புதுச்சேரி மாநிலத்தில் நேற்று புதிதாக 9,148 பேருக்கு பரிசோதனை செய்யப்பட்டது. இதில் புதுச்சேரி – 1,580, காரைக்கால் - 224, ஏனாம் – 152, மாகே - 18 பேர் என மொத்தம் 1,974 பேருக்கு புதிதாக கரோனா தொற்று கண்டறியப்பட்டுள்ளது. அத்துடன், புதுவையில் 24 பேர், காரைக்காலில் 4 பேர், ஏனாமில் 2 பேர் என 30 பேர் உயிரிழந்துள்ளனர். இவர்களில் 16 பேர் ஆண்கள், 14 பேர் பெண்கள் ஆவர். இதில் 15 பேர் 60 வயதுக்கு குறைவானவர்கள். உயிரிழந்தோர் எண்ணிக்கை 1,099 ஆக அதிகரித்துள்ளது.

இதுவரை 80,947 பேர் கரோனா தொற்றால் பாதிக்கப்பட்டுள்ளனர்.