அருணாச்சலபிரதேசத்தில் ஐஜத கட்சியின் 6 எம்எல்ஏக்கள் பாஜகவில் இணைந்தனர்

அருணாச்சல பிரதேசத்தில் மொத்தம் 60 உறுப்பினர்களைக் கொண்ட சட்டப்பேரவைக்கு கடந்த ஆண்டு நடந்த தேர்தலில், பாஜக 41 இடங்களில் வென்று ஆட்சியை கைப்பற்றியது. அதன் கூட்டணிக் கட்சியான ஐக்கிய ஜனதா தளம் (ஐஜத) 7 உறுப்பினர்களுடன் இரண்டாமிடம் பெற்றது.

இந்நிலையில், கட்சி விரோத செயல்பாட்டுக்கு விளக்கம் கேட்டு ஐஜத கட்சியின் 3 எம்எல்ஏ-க்களுக்கு கடந்த மாதம் கட்சித் தலைமை நோட்டீஸ் அனுப்பியது. மேலும் அவர்களை கட்சியில் இருந்தும் இடைநீக்கம் செய்தது. இதையடுத்து இவர்களுடன் மேலும் 3 எம்எல்ஏ-க்கள் சேர்ந்துகொண்டு 6 பேரும் தனி அணியாக செயல்பட்டு வந்தனர். இந்நிலையில், இந்த 6 பேரும் பாஜகவில் இணைந்தனர். இவர்களைத் தவிர அருணாச்சல் மக்கள் கட்சியின் ஒரே எம்எல்ஏவும் பாஜகவில் இணைந்தார். இதனை அம்மாநில சட்டப்பேரவை நேற்று அறிவித்தது. இதனால் சட்டப்பேரவையில் பாஜகவின் பலம் 41-ல் இருந்து 48 ஆக அதிகரித்துள்ளது.

எதிர்க்கட்சிகள் பலம் - காங்கிரஸ் 4, தேசிய மக்கள் கட்சி 4, ஐக்கிய ஜனதா தளம் 1, சுயேச்சைகள் 3 என 12 ஆக குறைந்துள்ளது.

பிஹாரில் பாஜகவுடன் இணைந்து நிதிஷ் குமார் ஆட்சி நடத்திவரும் நிலையில் அருணாச்சலில் அவரது கட்சி எம்எல்ஏ-க்களை பாஜக இணைத்திருப்பது அவருக்கு அதிர்ச்சியை ஏற்படுத்தி உள்ளதாக கூறப்படுகிறது. ஐஜத கட்சியின் தேசியக்குழு கூட்டம் இவ்வார இறுதியில் நடைபெற உள்ளது. அப்போது இந்த விவகாரம் எதிரொலிக்கும் என கூறப்படுகிறது.