ஐபிஎல் டி20 கிரிக்கெட் தொடரில் - மும்பையை வீழ்த்தியது டெல்லி அணி :

ஐபிஎல் டி20 கிரிக்கெட் தொடரில் நடப்பு சாம்பியனான மும்பை இந்தியன்ஸ் அணிக்கு எதிரான ஆட்டத்தில் 4 விக்கெட்கள் வித்தியாசத்தில் வெற்றி பெற்றது டெல்லி கேபிடல்ஸ் அணி.

ஷார்ஜாவில் நேற்று நடந்த இந்தஆட்டத்தில் முதலில் பேட் செய்தமும்பை அணியை 20 ஓவர்களில் 8 விக்கெட்கள் இழப்புக்கு 129 ரன்களுக்கு மட்டுப்படுத்தியது டெல்லிஅணி. அதிகபட்சமாக சூர்ய குமார்யாதவ் 26 பந்துகளில், 2 சிக்ஸர்கள், 2 பவுண்டரிகளுடன் 33 ரன்கள்சேர்த்தார். குயிண்டன் டி காக் 19, ஹர்திக் பாண்டியா 17, சவுரப் திவாரி 15, கிருணல் பாண்டியா 13, ஜெயந்த் யாதவ் 11, கேப்டன் ரோஹித் சர்மா 7 ரன்கள் சேர்த்தனர்.டெல்லி அணி சார்பில் அவேஷ் கான், அக்சர் படேல் ஆகியோர் தலா 3 விக்கெட்கள் வீழ்த்தினர்.

130 ரன்கள் இலக்குடன் பேட்செய்த டெல்லி அணி 19.1 ஓவர்களில்6 விக்கெட்கள் இழப்புக்கு 132 ரன்கள் எடுத்து 4 விக்கெட்கள் வித்தியாசத்தில் வெற்றி பெற்றது. ஒருகட்டத்தில் டெல்லி அணி 13.1 ஓவரில்93 ரன்களுக்கு 6 விக்கெட்களை இழந்து நெருக்கடியை சந்தித்தது. பிரித்வி ஷா 6, ஷிகர் தவண் 8,ஸ்டீவ் ஸ்மித் 9, ரிஷப் பந்த் 26,அக்சர் படேல் 9, ஷிம்ரன் ஹெட்மயர்14 ரன்களில் வெளியேறினர். எனினும் ஸ்ரேயஸ் ஐயர், ரவிச்சந்திரன் அஸ்வின் ஜோடி நிதானமாக விளையாடி அணியை வெற்றி பெற வைத்தது. ஸ்ரேயஸ் ஐயர் 33 பந்துகளில்,2 பவுண்டரிகளுடன் 33 ரன்களும் அஸ்வின் 21 பந்துகளில் ஒரு சிக்ஸருடன் 20 ரன்களும் சேர்த்தனர்.

டெல்லி அணிக்கு இது 9-வதுவெற்றியாகும். 18 புள்ளிகளுடன் டெல்லி அணி 2-வது இடத்தில் தொடர்கிறது. அதேநேரம் 12 ஆட்டங்களில் 7-வது தோல்வியை சந்தித்த மும்பை, 10 புள்ளிகளுடன் 6-வது இடத்தில் பின்தங்கியுள்ளது. அந்த அணி பிளே ஆஃப் சுற்றுக்குமுன்னேற வேண்டுமானால் எஞ்சிய2 ஆட்டங்களிலும் வெற்றி பெறுவதுடன் மற்ற ஆட்டங்களின் முடிவுக்கும் காத்திருக்க வேண்டிய நிலை ஏற்பட்டுள்ளது.

பெங்களூரு - பஞ்சாப்

இடம்: ஷார்ஜா

நேரம்: பிற்பகல் 3.30

கொல்கத்தா - ஹைதராபாத்

இடம்: துபாய்

நேரம்: இரவு 7.30

நேரலை: ஸ்டார் ஸ்போர்ட்ஸ்