வருமான வரிக்கு வட்டி செலுத்துவதில் விலக்கு கோரி - நடிகர் சூர்யா தாக்கல் செய்த மனு தள்ளுபடி :

வருமான வரிக்கு வட்டி செலுத்துவதில் இருந்து விலக்கு அளிக்கக் கோரி நடிகர் சூர்யா தாக்கல் செய்தமனுவை சென்னை உயர் நீதிமன்றம் தள்ளுபடி செய்துள்ளது.

நடிகர் சூர்யாவின் வீட்டில் கடந்த2010 அக்டோபரில் வருமானவரித் துறையினர் சோதனை நடத்தினர். அதைத் தொடர்ந்து 2007-08 மற்றும் 2008-09 ஆகிய ஆண்டுகளுக்கான வருமான வரியை மதிப்பீடு செய்து, 2011-ம் ஆண்டு வருமான வரித்துறை உத்தரவு பிறப்பித்தது.

இதை எதிர்த்து வருமானவரித் துறை தீர்ப்பாயத்தில் சூர்யா தரப்பிலும், வருமானவரித் துறை தரப்பிலும் மனுக்கள் தாக்கல் செய்யப் பட்டன. இந்த வழக்குகளை விசாரித்த மேல்முறையீட்டு தீர்ப்பாயம், 2007-08, 2008-09 ஆகிய ஆண்டுகளுக்கு ரூ.3 கோடியே 11லட்சத்து 96 ஆயிரத்தை வரியாக செலுத்த வேண்டும் என்ற வருமான வரித்துறை மதிப்பீட்டு அதிகாரியின் உத்தரவை உறுதி செய்தது.

இந்நிலையில், தீர்ப்பாயத்தில் தான் தொடர்ந்த வழக்கு 3 ஆண்டுகளுக்குப் பிறகு தீர்வு காணப்பட்டதால், வருமான வரி சட்டப்படி மாதம் 1 சதவீதம் வட்டி வசூலிப்பதில் இருந்து தனக்கு விலக்கு அளிக்க வேண்டும் எனக் கோரி கடந்த 2018-ம் ஆண்டு சென்னை உயர்நீதிமன்றத்தில் சூர்யா வழக்கு தொடர்ந்திருந்தார். வருமான வரித்துறைக்கு தான் முறையாக வரிசெலுத்தி வருவதாகவும், தீர்ப்பாயத்தின் காலதாமதத்துக்கு வருமானவரித் துறையே காரணம் என்பதால் வருமான வரி சட்டப்படி, வட்டி விலக்கு பெற தனக்கு உரிமை உள்ளதாகவும் மனுவில் தெரிவித்து இருந்தார்.

இந்த வழக்கு நீதிபதி எஸ்.எம்.சுப்ரமணியம் முன்பு நேற்று விசாரணைக்கு வந்தது. அப்போது, ‘‘வருமான வரி தொடர்பான சோதனை நடந்த 45 நாட்களுக்குள் வருமான வரிக்கான கணக்கை சூர்யா தாக்கல் செய்ய வேண்டும். ஆனால், சூர்யா காலதாமதமாகவே தனது கணக்கை தாக்கல் செய்துள்ளார். வருமான வரி மதிப்பீட்டு நடவடிக்கைகளுக்கு சூர்யா முழு ஒத்துழைப்பு தரவில்லை. சோதனைக்கு பிறகும் வருமானம் குறித்த முழு விவரங்களை அவர் அளிக்கவில்லை. எனவே, வருமான வரி சட்டப்படி, வட்டி விலக்கு பெற சூர்யாவுக்கு உரிமை இல்லை’’ என வருமான வரித்துறை தரப்பில்வாதிடப்பட்டது.

இருதரப்பு வாதங்களையும் கேட்ட நீதிபதி, இதுதொடர்பாக நடிகர் சூர்யா தாக்கல் செய்திருந்த மனுவை தள்ளுபடி செய்து உத்தரவிட்டுள்ளார்.