பொறியியல் சிறப்புப்பிரிவு கலந்தாய்வு நிறைவு: 668 மாணவர்களுக்கு சேர்க்கை இடங்கள் ஒதுக்கீடு

சென்னை: பொறியியல் படிப்புகளுக்கான சிறப்புப்பிரிவு கலந்தாய்வில் 668 மாணவர்கள் இடங்களை தேர்வு செய்தனர்.

மாணவர் சேர்க்கை கலந்தாய்வு கடந்த ஆகஸ்ட் 20-ம் தேதி தொடங்கியது. முதல்கட்டமாக முன்னாள் ராணுவத்தினரின் வாரிசுகள், மாற்றுத்திறனாளிகள், விளையாட்டு வீரர்கள் ஆகியோர் அடங்கிய சிறப்புப் பிரிவுக்கான கலந்தாய்வு தற்போது நடத்தி முடிக்கப்பட்டுள்ளது.

அதன்படி சிறப்புப்பிரிவு கலந்தாய்வில் 2,194 மாணவர்கள் கலந்துகொண்டனர். இதில் மாற்றுத்திறனாளிகள் பிரிவில் 151 பேர். முன்னாள் ராணுவ வீரர்களின் வாரிசுகள் பிரிவில் 138 பேர், விளையாட்டுப் பிரிவில் 321 பேர் என மொத்தம் 610 பேர் கல்லூரிகளை தேர்வு செய்தனர்.

அதேபோல், 7.5 சதவீத ஒதுக்கீட்டில் விண்ணப்பித்த அரசுப்பள்ளி மாணவர்களுக்கான சிறப்புப்பிரிவில் 58 பேர் கல்லூரிகளை தேர்வு செய்தனர். இவர்களுக்கான கல்லூரி சேர்க்கை கடிதம் வழங்கப்பட்டுள்ளன.

இதையடுத்து மாணவர்கள் ஒருவாரத்துக்குள் தேர்வு செய்த கல்லூரிகளை கட்டணம் செலுத்தி உறுதிசெய்ய வேண்டும். மேலும், பொதுப் பிரிவினருக்கான கலந்தாய்வு தேதி குறிப்பிடாமல் ஒத்தி வைக்கப்பட்டுள்ளது குறிப்பிடத்தக்கது.