விருத்தாச்சலம் - விழுப்புரம் இடையே இரட்டை ரயில் பாதை அமைக்கும் பணியால் ரயில் சேவையில் மாற்றம்

விருத்தாச்சலம் - விழுப்புரம் இடையே இரட்டை ரயில் பாதை அமைக்கும் பணி காரணமாக ரயில் சேவையில் மாற்றம் செய்யப்பட்டுள்ளன.

இதன்படி, மதுரை-விழுப்புரம் பயணி கள் ரயில் (56706/705) வரும் 26, 27, 28-ம் தேதிகளில் அரியலூர் - விழுப்புரம் இடையேயும், விருத்தாச்சலம் - சேலம் பயணிகள் ரயில் (76849/850) முகாசபரூர் - விருத்தாச்சலம் இடையே மார்ச் 28-ம் தேதியும், பெங்களூர் - காரைக்கால் பயணிகள் ரயில் (56514) 28-ம் தேதி விருத்தாச்சலம் - காரைக்கால் இடையேயும், காரைக்கால் - பெங்களூர் பயணிகள் ரயில் (56513) 28-ம் தேதி காரைக்கால் - முகாசபரூர் இடையேயும் ரத்து செய்யப்படுகின்றன.

திருச்சி - கடலூர் துறைமுக சந்திப்பு பயணிகள் ரயில் (76842) 28-ம் தேதி செந்துறையில் 30 நிமிடங்கள் நிறுத்தி வைக்கப்படும். சேலம் - விருத்தாச்சலம் பயணிகள் ரயில் (76850/849) வரும் 27-ம் தேதி வரை முகாசபரூர் வரை மட்டுமே இயக்கப்படும்.

ரயில் நேரம் மாற்றம்

நாகர்கோயில் - மும்பை சிஎஸ்டி விரைவு ரயில் (16352) 26-ம் தேதி காலை 5 மணிக்கு பதிலாக 60 நிமிடம் காலதாமதமாக புறப்படும். திருச்சி - ஹவுரா விரைவு ரயில் (12664) 28-ம் தேதி திருச்சியில் இருந்து மாலை 4 மணிக்குப் பதிலாக 75 நிமிடம் காலதாமதமாக புறப்படும்.

சென்னை எழும்பூர் - காரைக்குடி பல்லவன் விரைவு ரயில் (12605) 28-ம் தேதி எழும்பூரில் இருந்து பிற்பகல் 3.45 மணிக்கு புறப்படுவதற்கு பதிலாக 60 நிமிடங்கள் காலதாமதமாக புறப்படும்.

மாற்றுப்பாதையில் இயக்கம்

சென்னை எழும்பூர் - குருவாயூர் விரைவு ரயில் (16127) 26, 27, 28-ம் தேதிகளில் விழுப்புரம், மயிலாடுதுறை, திருச்சி வழியாக இயக்கப்படும். அதேபோல், குருவாயூர்-சென்னை எழும்பூர் விரைவு ரயில் (16128), சென்னை எழும்பூர்-மதுரை வைகை விரைவு ரயில் (12635), மதுரை - சென்னை எழும்பூர் வைகை விரைவு ரயில் (12636) ஆகியவை 28-ம் தேதி விழுப்புரம், மயிலாடுதுறை, திருச்சி வழியாக இயக்கப்படும்.

இதேபோல், சென்னை எழும்பூர் - திருச்சி (06047) இடையே வரும் 24, 28, 31-ம் தேதிகளிலும், திருச்சி - எழும்பூர் (06048) இடையே வரும் 23, 27, 30-ம் தேதிகளிலும் இயக்கப்பட உள்ள சிறப்புக் கட்டண சிறப்பு ரயில் விழுப்புரம், விருத்தாச்சலம், ஆத்தூர் வழியாக இயக்குவதற்குப் பதிலாக சென்னை கடற்கரை, அரக்கோணம், ஜோலார்பேட்டை மற்றும் சேலம் வழியாக இயக்கப்படும் என தெற்கு ரயில்வே நேற்று வெளியிட்ட செய்திக் குறிப்பில் தெரிவிக்கப்பட்டுள்ளது.