“மகளிருக்கு இலவசம்... கட்டணம் கேட்பதா?” - நகர் பேருந்தை நிறுத்திய பெண் @ சிவகங்கை

சிங்கம்புணரி: சிங்கம்புணரியிலிருந்து வேறு வழித்தடத்தில் இயக்க முற்பட்ட அரசு நகர் பேருந்தை பெண் பயணி ஒருவர் தடுத்து நிறுத்திய தோடு, மகளிரிடம் கட்டணம் வசூலிப்பதையும் தட்டிக்கேட்டு தடுத்து நிறுத்தினார்.

சிவகங்கை மாவட்டத்தில் ஒரு வழித் தடத்தில் இயக்கப்படும் அரசு நகர் பேருந்துகளை திடீர் திடீரென நிறுத்திவிட்டு, வேறு வழித் தடத்தில் இயக்குவதால் கிராம மக்கள் சிரமப்பட்டு வருகின்றனர். இந்நிலையில், கீழச்சிவல்பட்டி, சிங்கம்புணரி இடையே காலை, மாலை அரசு நகர் பேருந்து இயக்கப்பட்டு வருகிறது. நேற்று பிற்பகல் 3.30 மணிக்கு சிங்கம்புணரி பேருந்து நிலையத்தில் இருந்து கீழச்சிவல் பட்டிக்கு செல்ல வேண்டிய அரசு நகர் பேருந்தை நத்தத்துக்கு இயக்க ஊழியர்கள் முற்பட்டனர்.

அப்போது, இரணியூரைச் சேர்ந்த பிரியா ( 38 ) என்பவர் கீழச்சிவல்பட்டிக்கு செல்ல வேண்டிய பேருந்தை எப்படி நத்தத்துக்கு இயக்க முடியும் எனக் கேள்வி எழுப்பினார். ‘அதிகாரிகள் உத்தரவுப்படிதான் நாங்கள் பேருந்தை இயக்க முடியும்’ என்று ஊழியர்கள் தெரிவித்தனர். இதனால் இரு தரப்பினர் இடையே வாக்கு வாதம் ஏற்பட்டது. அங்கிருந்தவர்கள் அந்தப் பெண் பயணிக்கு ஆதரவாகப் பேசியதால் பேருந்து ஊழியர்கள் செய்வதறியாமல் திகைத்தனர்.

பின்னர், அதிகாரிகளிடம் கேட்டு கீழச்சிவல்பட்டிக்கு பேருந்தை இயக்க முடிவு செய்தனர். மேலும் கீழச்சிவல்பட்டி செல்ல அந்த பெண்ணிடம் கட்டணம் கேட்டனர். மாலையில் எங்கள் பகுதிக்கு மகளிர் இலவச நகர் பேருந்துதான் இயக்கப்படும். நீங்கள் வேறு வண்ணமுள்ள நகர் பேருந்தை இயக்கி பெண்களிடம் எப்படி கட்டணம் கேட்க முடியும் என அந்தப் பெண் மீண்டும் வாக்குவாதம் செய்தார். இதையடுத்து அதில் பயணித்த அனைத்து பெண் களிடமும் நடத்துநர் கட்டணம் வசூலிக்கவில்லை. வேறு வழித்தடத்தில் இயக்க முற்பட்ட அரசு நகர் பேருந்தை தடுத்ததோடு பெண் பயணிகளிடம் கட்டணம் வசூலித்ததையும் தடுத்து நிறுத்திய அந்தப் பெண்ணை சக பயணிகள் பாராட்டினர்.