வளையப்பட்டியில் சிப்காட் அமைக்க எதிர்ப்பு தெரிவித்து ஆற்றில் இறங்கி நூதன போராட்டம்

நாமக்கல்: சிப்காட் அமைக்க எதிர்ப்பு தெரிவித்து வளையப்பட்டி அருகே கரை போட்டான் ஆற்றில் இறங்கி சிப்காட் எதிர்ப்புக் குழுவினர் ஆர்ப்பாட்டத்தில் ஈடுபட்டனர்.

நாமக்கல் அருகே வளையப்பட்டியில் சிப்காட் அமைக்க இடம் தேர்வு செய்யும் பணி நடைபெற்று வருகிறது. இத்திட்டத்துக்கு எதிர்ப்பு தெரிவித்து அப்பகுதி விவசாயிகள், கிராம மக்கள் ஒன்றிணைந்து ‘சிப்காட் எதிர்ப்பு இயக்கம்’ ஏற்படுத்தி தொடர் போராட்டங்களில் ஈடுபட்டுள்ளனர்.

அதன் ஒரு பகுதியாக நேற்று வளையப்பட்டி கன்னிமாரத்தான் கருப்பண்ணசாமி கோயிலில் இருந்து 100-க்கும் மேற்பட்டோர் ஊர்வலமாகச் சென்று கரை போட்டான் ஆற்றில் இறங்கி சிப்காட் அமைக்க எதிர்ப்பு தெரிவித்து கோஷம் எழுப்பினர். முன்னதாக கோயில் வளாகத்தில் பொங்கல் வைத்து வழிபாடு நடத்தும் நூதன போராட்டத்திலும் ஈடுபட்டனர். எதிர்ப்புக் குழு நிர்வாகிகள் உள்பட பலர் கலந்து கொண்டனர்.