வத்தலக்குண்டு வழியாகக் கொடைக்கானல் மலை நோக்கிச் செல்கையில் `டம் டம் பாறை ‘ என்றோர் இடம் உண்டு. அங்கிருந்து பார்க்கையில், ஒரு மலையின் மீதிருந்து நீளமான வெள்ளை வால் தொங்குவதுபோல் ஓர் அருவி.
“அது என்ன அண்ணே?” என்று அங்கே பெட்டிக்கடை வைத்திருந்த சின்னையனிடம் கேட்டேன்.
“தண்ணி விழுகுதுப்பா. எலிவால் அருவின்னு சொல்வாங்க.”
`எலிவால் அருவி’. பொருத்தமான பெயர். பெயர் வைப்பதில் எளிய மனிதர்கள் சிறந்தவர்கள். தங்கள் வாழ்க்கையிலிருந்தும் அனுபவத்தில் சேகரித்த அறிவிலிருந்தும் அவர்கள் வைக்கும் பெயர்கள் பண்டிதத்தனம் இன்றி வெகு பொருத்தமாக இருக்கும்.
அந்தக் கடையில்தான் நான் `பன்’ பரமசிவத்தைச் சந்தித்தேன். பெட்டிக்கடை சின்னையன்தான் அந்தப் பெயரைச் சொல்லி ஆளையும் அறிமுகப்படுத்தினார்.
“பன்னு பரமசிவம், எங்க ஒரு வாரமா ஆளைக் காணாம்?”
