தேர்வைத் தைரியமாக எதிர்கொள்ளலாம்

ஆண்டுத்தேர்வில் அதிக மதிப்பெண்களைக் குவிக்க வேண்டும் என்ற நோக்கத்தில் அனைவரும் பாடங்களைச் சுறுசுறுப்பாகப் படித்துக்கொண்டிருப்பீர்கள். ஆனால் படிப்பது மட்டும் போதாது தேர்வை எதிர்கொள்ள. வேறு சில வழிமுறைகளும் தேவை, அவை என்ன?

தேர்வுக்கு முந்தைய தயாரிப்புகள்

# தேர்வுக்குக் குறைந்தது 10 நாட்களுக்கு முன்பாக அனைத்துப் பாடங்களையும் படித்துவிடுவது நல்லது.

# எந்தப் பாடம் பிடிக்குமோ, அந்தப் பாடத்தை முதலில் படித்தால் தன்னம்பிக்கை பிறக்கும்.

# தேர்வு நேரங்களில் கிரிக்கெட், டி.வி. போன்றவற்றை ஒதுக்கிவைத்து, பாடத்தில் மட்டும் கவனம் செலுத்துங்கள்.

# தேர்வு நேரத்தில் உடல் நிலையை நன்றாக வைத்திருக்க வேண்டும். தேர்வு நாட்களில் ஜுரம், தலைவலி ஆகியவை ஏற்படாமல் பார்த்துக்கொள்ள வேண்டும்.

# தொடர்ந்து படிக்கும் நேரங்களில் அவ்வப்போது தேநீர், பிஸ்கெட், வெள்ளரிக்காய், பேரீச்சம் பழம் ஆகியவற்றைச் சாப்பிட வேண்டும்

# கோடை காலம் என்பதால் அடிக்கடி தண்ணீர் குடிக்க வேண்டும்.

தேர்வுக்குத் தயார் செய்யும் முறை

# மொத்தமாகப் பாடங்களைப் படிப்பது நல்லதல்ல. பல்வேறு பகுதிகளாகப் பிரித்துப் படித்தால் மனதில் எளிதாகப் பாடங்கள் தங்கிவிடும்.

# தினசரி குறிப்பிட்ட நேரம் படிக்கும் வழக்கத்தைக் கொண்டுவர வேண்டும்.

# ஒரு மணி நேரம் படித்தால் 15 நிமிடங்கள் இடைவெளி விட வேண்டும்.

# படித்ததை எழுதிப் பார்க்க வேண்டும். ஒருமுறை எழுதினால் 16 முறை படித்ததற்குச் சமம்.

# பாடங்களைப் படிக்க அட்டவணை தயார் செய்ய வேண்டும். அதைத் தேர்வுக்கு ஒரு மாதத்திற்கு முன்னதாகவே தயார் செய்வது நல்லது.

# ஒவ்வொரு பாடத்திற்கும் குறிப்பிட்ட நேரம் ஒதுக்கி படிக்க வேண்டும். நன்றாகப் படித்த பாடங்களுக்கு குறைந்த நேரம், அதிகம் படிக்காத பாடங்களுக்கு அதிக நேரம் என்று ஒதுக்க வேண்டும்.

# கணக்கு, வரைபடங்கள் ஆகியவற்றுக்குத் தினசரி நேரம் ஒதுக்குவது நல்லது.

# மதிப்பெண் வாரியாக, பாடத்தைப் பிரித்துப் படிக்க வேண்டும். முதலில் அதிக மதிப்பெண்கள் கொண்ட கேள்விகள், கடைசியாக ஒரு வார்த்தை மதிப்பெண்கள் என்று படிக்க வேண்டும்

# தொடர்ந்து படிப்பது அலுப்பூட்டும். எனவே படிப்புக்கு மத்தியில் மனதுக்குப் பிடித்த காரியங்களைச் செய்வது பரீட்சை தொடர்பான பதற்றத்தைத் தணிக்கும். தியானம் செய்யலாம் அல்லது பிடித்த விளையாட்டுகளைச் சிறிது நேரம் விளையாடலாம்.

தேர்வு சமயத்தில்

# தேர்வுக்கு நான்கு அல்லது ஐந்து மணி நேரத்திற்கு முன்னதாகவே படிக்க வேண்டியவற்றைப் படித்து முடித்துவிட வேண்டும்.

# தேர்வுக்கு முந்தைய அரை மணி நேரத்தில் அவசர அவசரமாக எதையும் படிக்க முயல வேண்டாம்.

# தேர்வுக்குத் தேவையான அனைத்தும் இருக்கிறதா என்பதை ஒருமுறை சோதித்துப் பார்த்துவிட்டு தேர்வு அறைக்குள் நுழைய வேண்டும்.

# ஒரு மதிப்பெண்களுக்கான பதில்களை முதலில் எழுதி விட வேண்டும்.

# பிறகு தெரிந்த பதில்களை எழுத வேண்டும். தெரிந்த பதில்கள் எழுதுவதைத் தள்ளிப் போட வேண்டாம்

# கடைசி நேரத்தில் தெரியாத பதில்களை எழுதலாம். ஆனால் மனதில் பதற்றம் வேண்டாம்.

# தேர்வு முடிவதற்கு சில நிமிடங்கள் முன்னதாக எழுதுவதை நிறுத்திவிட்டு, கேள்வி எண்ணை போன்றவற்றை முறையாக எழுதியிருக்கிறோமா என்பதைச் சோதித்துக்கொள்ள வேண்டும்.

இப்படி முறையான பயிற்சியுடன் தேர்வைத் தைரியமாக எதிர்கொள்ளும்போது நீங்கள் எதிர்பார்த்த மதிப்பெண்கள் கிடைப்பது உறுதி.