உலக கோப்பை துளிகள்

1985-ம் ஆண்டு முதல் 2005-ம் ஆண்டு வரை 16 அணிகள் மட்டுமே உலகக் கோப்பை கால்பந்து போட்டிகளில் பங்கேற்றன. 2007-ம் ஆண்டு முதல் இது 24 அணிகளாக அதிகரிக்கப்பட்டது.

அமெரிக்கா, பிரேசில் ஆகிய அணிகள் யு-17 உலகக் கோப்பை கால்பந்து போட்டியில் அதிகபட்சமாக 16 முறை பங்கேற்றுள்ளன.

யு-17 உலகக் கோப்பை கால்பந்து போட்டிகள் ஆசியாவில்தான் அதிகபட்சமாக நடத்தப்பட்டுள்ளன. இந்தியா, இப்போட்டியை நடத்தும் 5-வது ஆசிய நாடாகும்.

யு-17 உலகக் கோப்பை கால்பந்து போட்டியை நைஜீரியா அணி அதிகபட்சமாக 5 முறை வென்றுள்ளது. 3 முறை அந்த அணி 2-வது இடத்தைப் பிடித்துள்ளது. துரதிருஷ்டவசமாக இந்த உலகக் கோப்பைக்கு நைஜீரியா தகுதிபெறவில்லை.

பிரேசில் அணி 3 முறையும், கானா, மெக்சிகோ ஆகிய அணிகள் இரு முறையும் யு17 உலகக் கோப்பை கால்பந்து போட்டியில் வென்றுள்ளன.

இந்திய அணி, யு-17 உலகக் கோப்பையில் பங்கேற்கும் 18-வது ஆசிய அணியாகும்.

இந்த உலகக் கோப்பை கால்பந்து போட்டியில் நைஜர், நியூ காலிடோனியா ஆகிய அணிகள் முதல் முறையாக பங்கேற்கின்றன.

யு-17 உலகக் கோப்பை போட்டிகளில் ஆடிய 12 வீரர்கள் தங்கள் அணிகளுக்காக பிபா உலகக் கோப்பை போட்டியிலும் ஆடியுள்ளனர்.

உலகக் கோப்பை போட்டி (2002) மற்றும் யு-17 உலகக் கோப்பை (1997) ஆகிய இரண்டையும் வென்ற அணிகளில் இடம்பெற்ற ஒரே வீரர் என்ற பெருமையை பிரேசிலின் ரொனால்டினோ பெற்றுள்ளார்.

2011-ம் ஆண்டு மெக்சிகோ மற்றும் உருகுவே அணிகளுக்கு இடையே நடந்த இறுதிப் போட்டிதான் அதிக பார்வையாளர்கள் திரண்ட யு-17 உலகக் கோப்பை கால்பந்து போட்டியாகும். மெக்சிகோ சிட்டியில் நடந்த இப்போட்டியை 98,943 ரசிகர்கள் நேரில் பார்த்து ரசித்தனர்.

2013-ம் ஆண்டு ஐக்கிய அரபு அமீரகத்தில் நடந்த யு-17 உலகக் கோப்பை கால்பந்து போட்டியில்தான் அதிக அளவில் கோல்கள் அடிக்கப்பட்டன. இப்போட்டியில் 52 ஆட்டங்களில் மொத்தம் 172 கோல்கள் அடிக்கப்பட்டன.

இதுவரை நடந்த யு-17 உலகக் கோப்பை கால்பந்து போட்டிகளில் பிரேசில் அதிகபட்சமாக 166 கோல்களையும், நைஜீரியா 149 கோல்களையும் அடித்துள்ளன.

இந்த உலகக் கோப்பை கால்பந்து போட்டியை 20 கோடி ரசிகர்கள் தொலைக்காட்சியில் பார்த்து ரசிப்பார்கள் என்று எதிர்பார்க்கப்படுகிறது.

யு-17 உலகக் கோப்பை கால்பந்து போட்டியில் முதல் முறையாக தங்கக் காலணி மற்றும் தங்கப் பந்தை வென்ற வீரர் பிரான்சின் புளோரண்ட் சினாமா பொங்கோல் (2001-ம் ஆண்டு).

யு-17 உலகக் கோப்பை போட்டியில் நைஜீரிய வீரர்கள் அதிகபட்சமாக 4 முறை தங்கப் பந்து விருதை வென்றுள்ளனர். - பிடிஐ