கொல்கத்தா அணியுடன் தோல்வி அடைந்தாலும் முதல் 4 இடங்களுக்குள் சிஎஸ்கே வர வாய்ப்பு

சென்னை: நடப்பு ஐபிஎல் கிரிக்கெட் சீசனில் கடைசியாக நடைபெற்ற லீக் ஆட்டத்தில் கொல்கத்தா நைட் ரைடர்ஸ் அணியுடன் சென்னை சூப்பர் கிங்ஸ் (சிஎஸ்கே) அணி தோல்வி கண்டபோதிலும் புள்ளிகள் பட்டியலில் முதல் 4 இடங்களுக்குள் வர வாய்ப்புள்ளது.

தற்போதைய நிலவரப்படி குஜராத் அணி 13 போட்டிகளில் விளையாடி 9 வெற்றி, 4 தோல்விகளுடன் 18 புள்ளிகளைப் பெற்று முதலிடத்தில் உள்ளது. சிஎஸ்கே அணி 13 போட்டிகளில் விளையாடி 7 வெற்றி, 5 தோல்வி, ஒரு போட்டியில் முடிவு இல்லை என்ற நிலையில் 15 புள்ளிகளுடன் 2-வது இடத்தில் உள்ளது.

இன்னும் 9 லீக் போட்டிகள் எஞ்சியுள்ள நிலையில் டெல்லி கேபிடல்ஸ் மற்றும் சன்ரைசர்ஸ் ஹைதராபாத் அணியைத் தவிர மற்ற அணிகள் முதல் 4 இடங்களுக்குள் வர வாய்ப்புகள் உள்ளன. அணிகள் பெறும் வெற்றி, தோல்விகளைப் பொறுத்து இந்த வாய்ப்புகள் அமையும் என கிரிக்கெட் நிபுணர்கள் தெரிவித்துள்ளனர்.

ஐபிஎல் அணிகள் முதல் 4 இடங்களுக்குள் வருவதற்கான வாய்ப்புகள் குறித்த அலசல்:

1. குஜராத்: முதலிடத்தில் உள்ள குஜராத் அணி, புள்ளிகள் அடிப்படையில் முதல் அணியாக நடப்பு சீசனில் பிளே ஆஃப் சுற்றுக்குள் நுழைந்துள்ளது. அந்த அணி முதலிடத்தில் நீடிக்க வாய்ப்புகள் அதிகரித்துள்ளது.

2. சிஎஸ்கே: நேற்று முன்தினம் நடைபெற்ற கொல்கத்தா அணியுடனான போட்டியில் சிஎஸ்கே தோல்வி அடைந்தாலும், பட்டியலில் 4 இடங்களுக்குள் வருவதற்கு அந்த அணிக்கு 94.9 சதவீத வாய்ப்புள்ளது. கடைசி ஆட்டத்தில் சிஎஸ்கே வென்றால் எளிதில் பிளே ஆஃப் சுற்றுக்கு முன்னேறும்.

3. மும்பை: 3-வது இடத்தில் மும்பை அணி இன்னும் 2 போட்டிகளில் விளையாடவுள்ளது. அந்த அணி பட்டியலில் முதல் 4 இடங்களுக்குள் வர 89.1 சதவீத வாய்ப்புகள் உள்ளன.

4. லக்னோ: தற்போது 4-வது இடத்தில் உள்ள லக்னோசூப்பர் ஜெயன்ட்ஸ் (எல்எஸ்ஜி), லீக் சுற்றின் முடிவில் பட்டியலில் 4 இடங்களுக்குள் வர வாய்ப்பு (65.2 சதவீதம்) உள்ளது.

5. பெங்களூரு: 5-வது இடத்தில் உள்ள ராயல் சாலஞ்சர்ஸ் பெங்களூரு (ஆர்சிபி) அணி, பட்டியலில் முதல் 4 இடங்களுக்குள் வருவதற்கான வாய்ப்பு 43.8 சதவீதம் அதிகரித்துள்ளது.

6. ராஜஸ்தான்: ஞாயிற்றுக்கிழமை நடைபெற்ற கடைசி ஆட்டத்தில் தோல்வி கண்டபோதிலும் ராஜஸ்தான் ராயல்ஸ் அணி பட்டியலில் 4 இடங்களுக்குள் வர 18.8 சதவீத வாய்ப்புள்ளது. கடைசி 2 ஆட்டத்திலும் வெற்றி பெற்று மற்ற அணிகள் தோல்வியுறும்போது இந்த வாய்ப்பு ராஜஸ்தானுக்குக் கிடைக்கும்.

7. கொல்கத்தா: முதல் 4 இடங்களுக்குள் வருவதற்கு கொல்கத்தா நைட் ரைடர்ஸ் அணிக்கு 21.1 சதவீத வாய்ப்பு உள்ளது. ஒரு அணியோ அல்லது 5 அணிகளுடனோ சம புள்ளிகளைப் பெறுவதற்கு அந்த அணிக்கு வாய்ப்பு உள்ளது.

8. பஞ்சாப்: பஞ்சாப் கிங்ஸ் லெவன் அணி, பட்டியலில் முதல் 4 இடங்களுக்குள் வர 43.8 சதவீத வாய்ப்புகள் உள்ளன.

9. ஹைதராபாத்: சன்ரைசர்ஸ் ஹைதராபாத் அணி குஜராத் அணியுடனான தோல்விக்கு பிறகு முதல் சுற்றில் இருந்து வெளியேறி உள்ளது.

10. டெல்லி: கடந்த சனிக்கிழமை பஞ்சாப் அணியுடன் தோல்வி கண்டதால் டெல்லி கேபிடல்ஸ் அணி பிளே ஆஃப் சுற்றுக்கான வாய்ப்பில் இருந்து வெளியேறிவிட்டது.

முதல் 4 இடங்களுக்குள் அணிகள் வருவதற்கான வாய்ப்புகள், அந்த அணிகள் பெறும் வெற்றி, எதிரணிகள் பெறும் தோல்வி, நிகர ரன் ரேட் போன்றவற்றைப் பொறுத்து அமையும் என்று நிபுணர்கள் தெரிவிக்கின்றனர்.