WT20 WC 2023 | பயிற்சி ஆட்டத்தில் வங்கதேசத்தை துவம்சம் செய்த இந்தியா: 52 ரன்கள் வித்தியாசத்தில் வெற்றி

ஸ்டெல்லன்போஷ்: மகளிர் டி20 உலகக் கோப்பை தொடரின் பயிற்சி ஆட்டத்தில் வங்கதேச அணியை 52 ரன்கள் வித்தியாசத்தில் வீழ்த்தி உள்ளது இந்திய மகளிர் கிரிக்கெட் அணி. இந்தப் போட்டியில் ரிச்சா கோஷ், 91 ரன்களை குவித்திருந்தார்.

தென் ஆப்பிரிக்க நாட்டில் 8-வது மகளிர் டி20 உலகக் கோப்பை தொடர் நடைபெற உள்ளது. வரும் 10-ம் தேதி முதல் 26-ம் தேதி வரையில் இந்த தொடர் அங்கு நடைபெறுகிறது. இந்தியா உட்பட மொத்தம் 10 அணிகள் இதில் பங்கேற்கின்றன. குரூப் மற்றும் நாக்-அவுட் என 23 போட்டிகள் நடைபெற உள்ளன.

இந்த தொடரில் இந்திய அணி குரூப் ‘பி’ பிரிவில் இடம் பெற்றுள்ளது. இந்த பிரிவில் இங்கிலாந்து, அயர்லாந்து, பாகிஸ்தான், மேற்கிந்திய தீவுகள் அணிகளும் இடம் பெற்றுள்ளன. வரும் 12-ம் தேதி பாகிஸ்தான் அணியுடன் இந்திய அணி விளையாடுகிறது. இந்நிலையில், தொடரின் வார்ம்-அப் போட்டியில் வங்கதேச அணியுடன் இந்தியா பலப்பரீட்சை செய்தது. ஆஸ்திரேலிய அணியுடனான முதல் வார்ம்-அப் போட்டியில் இந்தியா தோல்வியை தழுவி இருந்தது.

இந்தப் போட்டியில் டாஸ் வென்ற இந்திய அணி பேட்டிங் தேர்வு செய்தது. ரிச்சா கோஷ், 56 பந்துகளில் 91 ரன்களை குவித்தார். 3 பவுண்டரி மற்றும் 9 சிக்ஸர்களை அவர் விளாசி இருந்தார். ஜெமிமா ரோட்ரிக்ஸ், 27 பந்துகளில் 41 ரன்களை குவித்தார். 20 ஓவர்கள் முடிவில் 5 விக்கெட்டுகள் இழப்பிற்கு இந்திய அணி 183 ரன்கள் குவித்தது.

184 ரன்கள் எடுத்தால் வெற்றி என்ற இலக்கை வங்கதேசம் விரட்டியது. சரியான பார்ட்னர்ஷிப் அமைக்க முடியாமல் தடுமாறியது அந்த அணி. 20 ஓவர்கள் முடிவில் 8 விக்கெட்டுகள் இழப்பிற்கு 131 ரன்களை மட்டுமே வங்கதேசம் எடுத்திருந்தது. இதன் மூலம் இந்தியா வெற்றி பெற்றது.

இந்திய அணி சார்பில் தேவிகா வைத்யா, 2 விக்கெட்டுகளை கைப்பற்றி இருந்தார். ராஜேஸ்வரி கெய்க்வாட், அஞ்சலி சர்வானி, தீப்தி சர்மா, ராதா யாதவ், ஷபாலி வர்மா ஆகியோர் தலா ஒரு விக்கெட் வீழ்த்தினர். வங்கதேச வீராங்கனை நஹிதா அக்தர் ரன் அவுட்டாகி வெளியேறினார்.