இங்கிலாந்துக்கு எதிரான பகலிரவு டெஸ்டில் வில்லியம்சன் சதம் விளாசல்: மார்ட்டின் குரோவ், ராஸ் டெய்லர் சாதனை தகர்ப்பு

இங்கிலாந்து அணிக்கு எதிரான முதல் டெஸ்ட் போட்டியில் நியூஸிலாந்து அணியின் கேப்டன் கேன் வில்லியம்சம் சதம் விளாசினார். இது அவரது 18-வது சதமாக அமைந்தது. இதன் மூலம் நியூஸிலாந்து டெஸ்ட் கிரிக்கெட் வரலாற்றில் அதிக சதங்கள் அடித்திருந்த மார்ட்டின் குரோவ், ராஸ் டெய்லர் ஆகியோரது சாதனைகளை முறியடித்தார் வில்லியம்சன்.

ஆக்லாந்து நகரில் நேற்றுமுன்தினம் தொடங்கிய பகலிரவு டெஸ்ட் போட்டியில் முதலில் பேட் செய்த இங்கிலாந்து அணி டிரென்ட் போல்ட், டிம் சவுதி ஆகியோரது அனல் வேகப் பந்து வீச்சை தாக்குப் பிடிக்க முடியால் 20.4 ஓவர்களில் 54 ரன்களுக்கு சுருண்டது. 5 பேட்ஸ்மேன்கள் டக் ஆக 9-வது வீரராக களமிறங்கிய கிரெய்க் ஓவர்டன் 33 ரன்கள் சேர்த்து மிக மிகக்குறைந்த ரன்களுக்கு ஒட்டுமொத்த அணியும் வீழ்ந்து மோசமான சாதனை படைப்பதில் இருந்து காப்பாற்றினார்.

அவரை தவிர்த்து அலாஸ்டர் குக் 5, மார்க் ஸ்டோன்மேன் 11, டேவிட் மலான் 2, கிறிஸ் வோக்ஸ் 5, ஜேம்ஸ் ஆண்டர்சன் 1 ரன்கள் சேர்த்தனர். டிரென்ட் போல்ட் 6, டிம் சவுதி 4 விக்கெட்கள் கைப்பற்றினர். இதையடுத்து பேட்டிங்கை தொடங்கிய நியூஸிலாந்து அணி முதல் நாள் ஆட்டத்தின் முடிவில் 69 ஓவர்களில் 3 விக்கெட்கள் இழப்புக்கு 175 ரன்கள் எடுத்தது.

ஜீத் ராவல் 3, டாம் லதாம் 26, ராஸ் டெய்லர் 20 ரன்களில் ஆட்டமிழந்தனர். வில்லியம்சன் 91 ரன்களும், ஹென்றி நிக்கோல்ஸ் 24 ரன்களுடன் ஆட்டமிழக்காமல் இருந்தனர். கைவசம் 7 விக்கெட்கள் இருக்க 117 ரன்கள் முன்னிலையுடன் நேற்று 2-வது நாள் ஆட்டத்தை நியூஸிலாந்து அணி தொடர்ந்து விளையாடியது. நேர்த்தியாக பேட் செய்த வில்லியம்சன் 196 பந்துகளில், ஒரு சிக்ஸர், 11 பவுண்டரிகளுடன் சதம் விளாசினார். இது அவரது 18-வது சதமாக அமைந்தது.

இதன் மூலம் நியூஸிலாந்து டெஸ்ட் கிரிக்கெட் வரலாற்றில் அதிக சதங்கள் அடித்த மறைந்த முன்னாள் வீரர் மார்ட்டின் குரோவ் மற்றும் தற்போது அணியில் விளையாடி வரும் சீனியர் வீரர் ராஸ் டெய்லர் ஆகியோரது சாதனைகளை முறியடித்தார் வில்லியம்சன். இருவரும் தலா 17 சதங்கள் அடித்துள்ளனர் என்பது குறிப்பிடத்தக்கது. நியூஸிலாந்து அணி 79 ஓவர்களில் 3 விக்கெட்கள் இழப்புக்கு 197 ரன்கள் சேர்த்திருந்த போது மழையால் ஆட்டம் தடைபட்டது.

சுமார் ஒரு மணி நேரத்துக்கு பிறகு தொடங்கப்பட்ட ஆட்டத்தில் இங்கிலாந்து அணி புதிய பந்தை கையில் எடுத்ததும், வில்லியம்சன் ஆட்டமிழந்தார். 220 பந்துகளில், ஒரு சிக்ஸர், 11 பவுண்டரிகளுடன் 102 ரன்கள் எடுத்த வில்லியம்சன், ஜேம்ஸ் ஆண்டர்சனின் ஸ்விங் பந்தில் எல்பிடபிள்யூ ஆனார். 4-வது விக்கெட்டுக்கு ஹென்றி நிக்கோல்ஸூடன் இணைந்து வில்லியம்சன் 83 ரன்கள் சேர்த்தார். இதையடுத்து வாட்லிங் களமிங்கினார். ஹென்றி நிக்கோல்ஸ் நிதானமாக விளையாட வாட்லிங், மட்டையை சுழற்றினார்.

நியூஸிலாந்து அணி 92.1 ஓவரில் 4 விக்கெட்கள் இழப்புக்கு 229 ரன்கள் எடுத்திருந்த போது மீண்டும் மழை குறுக்கிட்டது. இதனால் மேற்கொண்டு ஆட்டத்தை தொடர முடியாததால் 2-வது நாள் ஆட்டம் முடித்துக் கொள்ளப்பட்டது. ஹென்றி நிக்கோல்ஸ் 143 பந்துகளில், 3 பவுண்டரிகளுடன் 49 ரன்களுடனும், வாட்லிங் 17 பந்தில் 20 ரன்களுடனும் ஆட்டமிழக்காமல் இருந்தனர். இங்கிலாந்து அணி தரப்பில் ஜேம்ஸ் ஆண்டர்சன் 3 விக்கெட்கள் கைப்பற்றினார். கைவசம் 6 விக்கெட்கள் இருக்க 171 ரன்கள் முன்னிலையுடன் நியூஸிலாந்து அணி இன்று 3-வது நாள் ஆட்டத்தை தொடர்ந்து விளையாடுகிறது. - ஏஎப்பி