வார ராசிபலன் 19-01-2017 முதல் 25-01-2017 வரை (மேஷம் முதல் கன்னி வரை)

மேஷ ராசி வாசகர்களே

உங்கள் ராசிக்கு 7-ல் குருவும் 10-ல் சூரியனும், 11-ல் சுக்கிரனும் கேதுவும் உலவுவது சிறப்பாகும். எதிர்ப்புகளை வெல்வீர்கள். எடுத்த காரியத்தில் வெற்றி கிடைக்கும். நல்லவர்கள் உங்களுக்கு நண்பராவார்கள். அவர்களால் நன்மையும் உண்டாகும். திருமணம் போன்ற சுப காரியங்கள் நிகழும். பொருளாதார நிலை உயரும். பயணத்தால் நலம் உண்டாகும். கணவன் மனைவி உறவு நிலை சீராகும். தொழில் கூட்டாளிகள் ஒத்துழைப்பார்கள். அரசியல் ஈடுபாடு ஆக்கம் தரும். நிர்வாகத்துறையினருக்கு வரவேற்பு கூடும்.

புதிய பதவி, பட்டங்கள் கிடைக்கும். கலைத்துறையினருக்கு நல்ல வாய்ப்புக்கள் கூடிவரும். வாரப் பின்பகுதியில் சந்திரன், சனியோடு கூடி 8-ம் இடத்தில் உலவும் நிலை அமைவதால் மன அமைதி குறையும். உடல் ஆரோக்கியத்தில் கவனம் தேவைப்படும். கெட்டவர்களின் தொடர்புக்கு இடம் தரலாகாது. தாய் நலனில் அக்கறை செலுத்த வேண்டிவரும். பயணத்தின்போதும் இயந்திரங்களில் பணிபுரியும்போதும் எச்சரிக்கை தேவை.

அதிர்ஷ்டமான தேதி: ஜனவரி 19.

திசைகள்: வடமேற்கு, வடகிழக்கு, தென்கிழக்கு.

‎நிறங்கள்: மெரூன், இளநீலம், பொன் நிறம், ஆரஞ்சு.

எண்கள்: 1, 3, 6, 7, 9.‎

பரிகாரம்: 8-ல் உள்ள சனிக்குப் பிரீதி, பரிகாரங்களைச் செய்து கொள்வது நல்லது. அனுமனை வழிபடவும்.

ரிஷப ராசி வாசகர்களே

உங்கள் ராசிக்கு 8-ல் புதனும் 10-ல் கேதுவும் 11-ல் செவ்வாயும் உலவுவது சிறப்பாகும். மனத்தில் துணிவும் தன்னம்பிக்கையும் கூடும். எதிர்ப்புக்களை வெல்லும் சக்தி பிறக்கும். வழக்கில் சாதகமான போக்கு தென்படும். போட்டிகளில் வெற்றி கிட்டும். வியாபார முன்னேற்றத் திட்டங்கள் நிறைவேறும். ஆன்மிகவாதிகளுக்கு மதிப்பு உயரும். பொறியியல், சட்டம், காவல், ராணுவம் போன்ற துறைகளைச் சேர்ந்தவர்கள் முன்னணிக்கு உயருவார்கள். உடன்பிறந்தவர்கள் பக்கபலமாக இருப்பார்கள்.

எதிர்பாராத பொருட்சேர்க்கை நிகழும். நிலபுலங்கள் லாபம் தரும். செந்நிறப்பொருட்களாலும் ஜலப்பொருட்களாலும் ஆதாயம் கிடைக்கும். குரு 6-ல் இருப்பதால் பொருளாதாரப் பிரச்சினைகள் ஏற்படும். கொடுக்கல் வாங்கலில் கவனம் தேவை. பெற்றோருக்கும் மக்களுக்கும் இடையே கருத்து வேறுபாடுகள் உண்டாகும். பக்குவமாகச் சமாளிப்பது நல்லது. பெரியவர்களின் அதிருப்திக்கு ஆளாகாமல் இருப்பது அவசியமாகும். வீண் அலைச்சலைத் தவிர்க்கவும்.

அதிர்ஷ்டமான தேதிகள்: ஜனவரி 19, 23.

திசைகள்: வடமேற்கு, தெற்கு, வடக்கு.

நிறங்கள்: மெரூன், பச்சை.

எண்கள்: 5, 7, 9.

பரிகாரம்: ராகுவையும் குருவையும் வழிபடுவது நல்லது. துர்க்கையையும் தட்சிணாமூர்த்தியையும் வழிபடவும். வேத விற்பன்னர்களுக்கு உதவி செய்வது நல்லது.

மிதுன ராசி வாசகர்களே

உங்கள் ராசிக்கு 3-ல் ராகுவும், 5-ல் குருவும் 6-ல் சனியும் 9-ல் சுக்கிரனும் 10-ல் செவ்வாயும் உலவுவது நல்லது. நண்பர்களும் உறவினர்களும் உங்களுக்கு உதவி புரிவார்கள். புத்திசாலித்தனமும் செயல் திறமையும் பளிச்சிடும். எடுத்த காரியங்களில் வெற்றி கிட்டும். பண நடமாட்டம் திருப்தி தரும். திடீர் அதிர்ஷ்ட வாய்ப்புக்கள் கூடிவரும். மக்களால் நலம் உண்டாகும். பொது நலப்பணிகளில் ஆர்வம் கூடும். கலைஞர்கள் வெற்றி நடைபோடுவார்கள். மாதர்களது எண்ணம் ஈடேறும்.

புதிய ஆடை, அணிமணிகள் சேரும். உத்தியோகஸ்தர்கள், ஆசிரியர்கள், தொழிலாளர்கள், விவசாயிகள் ஆகியோருக்கெல்லாம் முன்னேற்றமான சூழ்நிலை நிலவிவரும். நிலபுலங்கள் சேரும். சொத்துக்கள் மூலம் வருவாயும் கிடைத்துவரும். சூரியன் 8- லும் கேது 9-லும் இருப்பதால் உஷ்ண சம்பந்தமான உபாதைகள் ஏற்படும். தந்தை நலனில் கவனம் செலுத்த வேண்டிவரும். அரசுப்பணிகளில் விழிப்பு தேவை. உடன்பிறந்தவர்களால் ஓரிரு காரியங்கள் நிறைவேறும். கணவன் மனைவி உறவு நிலை சீராகவே இருந்துவரும்.

அதிர்ஷ்டமான தேதிகள்: ஜனவரி 19, 23.

திசைகள்: தென்மேற்கு, வடகிழக்கு, மேற்கு, தென்கிழக்கு.

நிறங்கள்: புகை நிறம், நீலம், பொன் நிறம்.

எண்கள்: 3, 4, 6, 8.

பரிகாரம்: விநாயகரை வழிபடவும். ஆதித்ய ஹ்ருதயம் பாராயணம் செய்யவும்.

கடக ராசி வாசகர்களே

உங்கள் ஜன்ம ராசிக்கு 6-ல் புதனும் 8-ல் சுக்கிரனும் உலவுவது நல்லது. 4-ல் உலவும் குருவும் 9-ல் உலவும் செவ்வாயும் ஓரளவு நலம் புரிவார்கள். நல்ல தகவல் வந்து சேரும். உடன்பிறந்தவர்களால் அனுகூலம் உண்டாகும். தான, தர்மப்பணிகளில் ஈடுபாடு கூடும். நல்லவர்களின் தொடர்பு நலம் சேர்க்கும். நல்லவர் அல்லாதவர்களை இனம் கண்டு கொண்டு அவர்களிடமிருந்து விலகியிருப்பது அவசியமாகும். புதியவர்களை நம்பி ஏமாற வேண்டாம். மக்களால் மன அமைதி குறையும்.

வியாபாரிகளுக்கு லாபம் கூடும். கலைத்துறையினருக்கு நல்ல வாய்ப்புக்கள் கூடிவரும். குடும்பத்தில் சிறுசிறு சச்சரவுகள் ஏற்படும். வீண்வம்பு வேண்டாம். நிலம், மனை, வீடு, வாகனங்களால் அளவோடு வருவாய் கிடைத்துவரும். தொழிலாளர்களும் விவசாயிகளும் அதிகம் பாடுபட வேண்டிவரும். மறதியால் அவதிப்பட நேரலாம். மார்பு, வயிறு சம்பந்தமான உபாதைகள் சிலருக்கு ஏற்படும். பிறரிடம் கோபப்படாமல் சுமுகமாகப் பழகி வருவது நல்லது.

அதிர்ஷ்டமான தேதிகள்: ஜனவரி 19, 23.

திசைகள்: வடக்கு, தென்கிழக்கு.

நிறங்கள்: வெண்மை, பச்சை.

எண்கள்: 5, 6.

பரிகாரம்: நாகரையும் ஆஞ்சநேயரையும் வழிபடவும்.

சிம்ம ராசி வாசகர்களே

உங்கள் ராசிக்கு அதிபதி சூரியன் 6-ல் உலவுவது ஒன்றே சிறப்பாகும். இதர கிரகங்களின் சஞ்சாரம் சிறப்பாக இல்லாததால் எதிலும் ஒருமுறைக்குப் பலமுறை யோசித்து ஈடுபடவும். வீண்சண்டை, சச்சரவுகளைத் தவிர்க்கவும். குடும்ப நலனில் கவனம் செலுத்தவும். பொருள் கொடுக்கல் வாங்கலில் எச்சரிக்கை தேவை. பிறரால் ஏமாற்றப்பட நேரலாம். அக்கம்பக்கத்தாராலும் உடன்பணிபுரிபவர்களாலும் பிரச்சினைகள் சூழும். நிலம், மனை, வீடு, வாகனம் போன்றவற்றால் பிரச்சினைகள் ஏற்படும். சொத்து சம்பந்தமான வழக்கில் ஈடுபட வேண்டிய நிலை சிலருக்கு உண்டாகும்.

பழைய சொத்துக்களை விற்கவும் நேரலாம். சிறு விபத்துக்கு ஆளாக நேரலாம் என்பதால் பயணத்தின்போதும் இயந்திரங்களில் பணிபுரியும்போதும் பாதுகாப்புத் தேவை. கணவன் மனைவி இடையே கருத்து வேறுபாடுகள் ஏற்படும். விட்டுக் கொடுத்துப் பழகிவருவது நல்லது. அரசுப்பணிகளில் வளர்ச்சி காண வழிபிறக்கும். நிர்வாகத்துறையினருக்கு நல்ல வாய்ப்புக்கள் கூடிவரும். அரசியல்வாதிகள் ஓரளவு நலம் பெறுவார்கள். முக்கியஸ்தர்களின் ஆதரவு கிடைக்கும்.

அதிர்ஷ்டமான தேதிகள்: ஜனவரி 19, 23.

திசை: கிழக்கு.

நிறம்: ஆரஞ்சு.

எண்: 1.

பரிகாரம்: கோளறு திருப்பதிகம் வாசிக்கவும்.

கன்னி ராசி வாசகர்களே

உங்கள் ராசிக்கு 2-ல் குருவும் 3-ல் சனியும், 4-ல் புதனும் 6-ல் கேதுவும் உலவுவது சிறப்பாகும். செல்வாக்கும் மதிப்பும் உயரும். குடும்ப நலம் சிறப்பாக இருந்துவரும். சுப காரியங்கள் நிகழும். நல்லவர்கள் உங்களுக்கு நண்பர்கள் ஆவார்கள். அவர்களால் அனுகூலமும் உண்டாகும். பொருளாதார நிலை உயரும். பேச்சில் திறமை வெளிப்படும். கடன் தொல்லை குறையும். பொது நலப்பணியாளர்களுக்கு மதிப்பு உயரும். உத்தியோகஸ்தர்கள், ஆசிரியர்கள், ஆன்மிகவாதிகள், வங்கிப் பணியாளர்கள், சேமிப்பு நிறுவனங்களில் தொழில் புரிபவர்கள் ஆகியோருக்கெல்லாம் அனுகூலமான சூழ்நிலை நிலவிவரும்.

வியாபாரத்தில் வளர்ச்சி காண வாய்ப்பு உண்டாகும். மாணவர்களது திறமை வெளிப்படும். கணிதம், எழுத்து, பத்திரிகை, தரகுத் துறைகளைச் சேர்ந்தவர்கள் வளர்ச்சி காண்பார்கள். 6-ல் சுக்கிரனும் 7-ல் செவ்வாயும் உலவுவதால் கணவன் மனைவி இடையே சலசலப்புக்கள் ஏற்படும். பெண்களால் பிரச்சினைகள் சூழும். பயணத்தின்போதும் இயந்திரங்களில் பணிபுரியும்போதும் எச்சரிக்கை தேவை. மாதர்கள் விழிப்புடன் செயல்படுவது நல்லது.

அதிர்ஷ்டமான தேதிகள்: ஜனவரி 19, 23.

திசைகள்: மேற்கு, வடகிழக்கு, வடமேற்கு, வடக்கு.

நிறங்கள்: நீலம், மெரூன், பொன் நிறம், பச்சை.

எண்கள்: 3, 5, 7, 8.

பரிகாரம்: துர்க்கைக்கும் சுப்பிரமணியருக்கும் அர்ச்சனை, ஆராதனைகளைச் செய்துவருவது நல்லது. ஸ்ரீ சூக்தம் சொல்வதும் கேட்பதும் சிறப்பாகும். சுமங்கலிப் பெண்களுக்கு மங்கலப் பொருட்களைக் கொடுப்பது நல்லது.