பெங்களூரு: யஷ் நடிப்பில் வெளியான ‘டாக்ஸிக்’ திரைப்படத்துக்கு நெகட்டிவ் விமர்சனங்கள் காரணமாக அதன் ஓடிடி உரிமை விற்பனையில் சிக்கல் ஏற்பட்டுள்ளது.
‘கே.ஜி.எஃப்’ படங்களின் பிரம்மாண்ட வெற்றிக்குப் பிறகு யஷ் நடிப்பில் மிகவும் எதிர்பார்க்கப்பட்டு, கடந்த ஆகஸ்ட் 26-ஆம் தேதி திரையரங்குகளில் வெளியான 'டாக்ஸிக்' திரைப்படம் ரசிகர்களின் எதிர்மறையான விமர்சனங்களால் பாக்ஸ் ஆபீஸில் பெரும் சரிவைச் சந்தித்துள்ளது.
பெரும் பொருட்செலவில் உருவாகி, ரூ.337 கோடி மட்டுமே வசூலித்து பாக்ஸ் ஆபீஸில் தோல்வியடைந்ததைத் தொடர்ந்து, இப்படத்தின் டிஜிட்டல் ஓடிடி உரிமத்தின் விலையும் எதிர்பாராத அளவிற்குப் பலத்த அடிவாங்கியுள்ளது.
திரையரங்குகளில் வெளியாவதற்கு முன்பு, இப்படத்தின் ஓடிடி உரிமத்துக்கு முன்னணி நிறுவனம் ஒன்று ரூ.150 கோடி வரை வழங்க முன்வந்தது. ஆனால், படம் திரையரங்குகளில் வெளியாகி ரூ.1000 கோடிக்கும் மேல் வசூலிக்கும் என்ற நம்பிக்கையில், ஓடிடி உரிமத்தை ரூ.200 கோடிக்கும் அதிகமாக விற்க படக்குழுவினர் திட்டமிட்டிருந்தனர்.
ஆனால் தியேட்டர்களில் படம் மோசமான வரவேற்பை பெற்றதால், தற்போது ஓடிடி தளங்கள் அனைத்து மொழிகளுக்குமான உரிமத்துக்கு வெறும் ரூ.30 கோடி மட்டுமே வழங்க முன்வந்துள்ளதாகத் தகவல்கள் வெளியாகியுள்ளன.
இந்த எதிர்பாராத இழப்பைக் குறைக்கும் வகையில், ஓடிடி பதிப்புக்காக படத்தின் காட்சிகளை முற்றிலுமாக மாற்றி அமைத்து எடிட் செய்யப்பட்ட ஒரு புதிய பதிப்பை வெளியிடப் படக்குழுவினர் ஆலோசித்து வருகின்றனர்.
கீது மோகன்தாஸ் இயக்கத்தில், கோவாவை மையமாகக் கொண்டு உருவாக்கப்பட்ட இப்படத்தில் யஷுடன் கியாரா அத்வானி, நயன்தாரா, தாரா சுதாரியா, ஹுமா குரேஷி, ருக்மிணி வசந்த் உள்ளிட்ட பலர் முக்கிய கதாபாத்திரங்களில் நடித்திருந்தனர்.
