சென்னை: லெஜண்ட் சரவணன் நடித்த ‘லீடர்’ திரைப்படம் ஓடிடியில் வெளியாக உள்ளது. இதனை படக்குழு அதிகாரபூர்வமாக அறிவித்துள்ளது.
'தி லெஜண்ட்' திரைப்படத்தின் மூலம் தமிழ் சினிமாவில் கதாநாயகனாக அறிமுகமான லெஜண்ட் சரவணனின் இரண்டாவது படம் 'லீடர்'. 'எதிர்நீச்சல்', 'காக்கி சட்டை', 'கொடி' மற்றும் 'கருடன்' உள்ளிட்ட திரைப்படங்களை இயக்கிய துரை செந்தில்குமார் இயக்கத்தில் ‘லெஜெண்ட்’ சரவணன் தயாரித்து நாயகனாக நடித்தார்.
சந்தோஷ் பிரதாப், ஷாம், ஆண்ட்ரியா உள்ளிட்டோர் இப்படத்தில் முக்கிய வேடங்களில் நடித்துள்ளனர். ஸ்பை த்ரில்லர் ஜானரில் உருவான இப்படத்துக்கு ஜிப்ரான் இசையமைத்துள்ளார். கடந்த ஏப்ரல் 3 அன்று வெளியான இப்படம் கலவையான விமர்சனங்களை பெற்றது.
இந்த நிலையில் இப்படம் தற்போது ஓடிடி வெளியீட்டுக்கு தயாராகியுள்ளது. வரும் மே 29ஆம் தேதி அன்று இப்படம் அமேசான் ப்ரைம் ஓடிடி தளத்தில் வெளியாக உள்ளது. தமிழ், தெலுங்கு, கன்னடம் மற்றும் மலையாளம் ஆகிய நான்கு மொழிகளில் இப்படம் வெளியாக உள்ளதாக படக்குழு அதிகாரபூர்வமாக தெரிவித்துள்ளது.
