ஜன.1 முதல் கோவின் தளத்தில் 15 முதல்18 வயது பிரிவினர் பதிவிடலாம்: எவ்வாறு பதிவு செய்வது?

புதுடெல்லி: 15 வயது முதல் 18 வயதுள்ளவர்களுக்கு 2022 ஜனவரி 3-ம் தேதி முதல் தடுப்பூசி செலுத்தப்பட இருக்கும் நிலையில், ஜனவரி 1-ம் தேதி முதல் கோவின் தளத்தில் தங்கள் விவரங்களை பதிவு செய்யலாம் எனத் தெரிவிக்கப்பட்டுள்ளது.

நாட்டில் ஒமைக்ரான் வைரஸ் பரவல் அதிகரித்து வருவதையடுத்து, பூஸ்டர் டோஸ் தடுப்பூசியும், குழந்தைகளுக்குத் தடுப்பூசி செலுத்தவும் மத்திய அரசு முடிவு செய்தது. இதுதொடர்பாக கடந்த சனிக்கிழமை மக்களுக்கு உரையாற்றிய பிரதமர் மோடி, 2022 ஜனவரி 3-ம் தேதி முதல் 15 முதல் 18 வயதுள்ள பிரிவினருக்கு தடுப்பூசியும், 10-ம் தேதி முதல் இணைநோய்கள் இருக்கும் 60 வயதுக்கு மேற்பட்டோர், முன்களப்பணியாளர்களுக்கு முன்னெச்சரி்க்கை டோஸ் தடுப்பூசியும் செலுத்தப்பட உள்ளது என்று அறிவித்தார்.

இது குறித்து கோவின் தளத்தின் தலைவர் மருத்துவர் ஆர்எஸ் சர்மா இன்று நிருபர்களுக்கு அளித்த பேட்டியில் “2022 ஜனவரி 3-ம் தேதி முதல் 15 முதல் 18 வயதுள்ளவர்களுக்கு தடுப்பூசி செலுத்தப்பட உள்ளது. இந்த வயதுள்ள பிரிவினர் ஜனவரி 1-ம் தேதி முதல் கோவின் தளத்தில் தங்கள் விவரங்களைப் பதிவு செய்யலாம். இதற்கான வசதி உருவாக்கப்பட்டுள்ளது.

இந்த வயதுள்ள பிரிவினர் ஆதார் கார்டு மூலம் பதிவு செய்யலாம். சிலரிடம் ஆதார் அட்டை இல்லாவிட்டால், பள்ளியில் வழங்கப்பட்டுள்ள அடையாள அட்டையை வைத்து முன்பதிவு செய்யலாம்” எனத் தெரிவித்தார்

15 வயது முதல் 18 வயதுள்ள பிரிவினருக்கு தடுப்பூசி செலுத்த கோவாக்சின் தடுப்பூசி மட்டுமே இருக்கிறது. ஜைடஸ் கெடிலா நிறுவனத்தின் ஜைகோவ்-டி தடுப்பூசிக்கு இந்திய மருந்துக் கட்டுப்பாட்டு அமைப்பு அனுமதியளித்தபோதிலும் இன்னும் நடைமுறைக்குவரவில்லை. 15 முதல் 18 வயதுள்ள பிரிவில் ஏறக்குறைய 7 முதல் 8 கோடி வரை தடுப்பூசி செலுத்துவார்கள் எனத் தெரிகிறது

எவ்வாறு கோவின் தளத்தில் பதிவு செய்வது? - வழிமுறை இதோ...

• கோவின் செயலிலை மொபைலில் பதிவிறக்கம் செய்யலாம்அல்லது கோவின் தளத்துக்கு (cowin.gov.in.) செல்லலாம்.
• ஹோம்பேஜில் பதிவு செய்தல் பட்டனை கிளிக் செய்ய வேண்டும்
• 10 இலக்க மொபைல் எண்ணை பதிவு செய்து ஓடிபி பட்டனை கிளிக் செய்ய வேண்டும்.
• பதிவு செய்யப்பட்ட மொபைல் எண்ணுக்கு ஒடிபி எண் வரும்
• உங்கள் பெயர், அடையாள அட்டை விவரம் அல்லது ஆதார் எண், மாணவர் அடையாள அட்டை எண் ஆகியவற்றை பதிவு செய்யலாம்.
• அனைத்தும் பதிவு செய்யப்பட்டபின், கோவின் தளத்தில் பதிவு செய்தல் முடிந்துவிடும்
• கோவின் தளத்தில் உங்கள் விவரங்களை சரிபார்த்தபின், தடுப்பூசிக்கான ஸ்லாட்டை பதிவு செய்ய வேண்டும்.