ஆந்திராவில் பட்டாசு ஆலை தீயில் 4 பேர் பலி

தீபாவளி பண்டிகை நெருங்குவதை யொட்டி ஆந்திர மாநிலம் விசாகப் பட்டினம் மாவட்டம் தேவரபல்லி மண்டலம் ஏ.கொத்தபல்லி என்ற கிராமத்தில் சிலர் சட்டவிரோதமாக பட்டாசு தயாரிப்பில் ஈடுபட்டு வந்தனர். இதில் 20-க்கும் மேற்பட்டோர் பணியாற்றி வந்தனர்.

இந்நிலையில் நேற்று மதியம், இந்த தொழிற்சாலையில் திடீரென தீ விபத்து ஏற்பட்டது. அப்போது பட்டாசுகள் வெடித்து சிதறியதால் தொழிலாளர்கள் அலறியடித்துக் கொண்டு ஓடினர். எனினும் தீயில் சிக்கி 3 பேர் சம்பவ இடத்திலேயே இறந்தனர். 2 பேர் படுகாயம் அடைந்தனர். காயம் அடைந்த இருவரும் மருத்துவமனையில் சேர்க்கப்பட்டனர். இங்கு சிகிச்சை பலனின்றி ஒருவர் இறந்தார்.

விபத்து குறித்து தேவரபல்லி போலீஸார் வழக்கு பதிவு செய்து விசாரணை மேற்கொண்டுள்ளனர்.