‘அனைவரையும் திறந்த மனதுடன் வரவேற்கும் நாடு இந்தியா’ - அமெரிக்காவுக்கு அமைச்சர் ஜெய்சங்கர் பதில்

புதுடெல்லி: புலம்பெயர் மக்களை இந்தியா விரும்புவதில்லை என்றும் அங்கு அந்நியர்கள் மீதான வெறுப்பு அதிகரித்து இருக்கிறது என்றும் அமெரிக்க அதிபர் ஜோ பைடன் சமீபத்தில் கூறியிருந்தார். இதற்கு மறுப்பு தெரிவித்துள்ள இந்திய வெளியுறவுத் துறை அமைச்சர் ஜெய்சங்கர் “இந்தியா அனைத்து சமூக மக்களையும் எப்போதும் திறந்த மனதுடனே வரவேற்கிறது” என்று குறிப்பிட்டுள்ளார்.

சில நாட்களுக்கு முன்பு அமெரிக்காவின் வளர்ச்சி குறித்து அதிபர் பைடன் பேசுகையில் “அமெரிக்காவின் பொருளாதாரம் தொடர்ந்து வளர்ச்சியடைகிறது.

காரணம், அமெரிக்கா புலம்பெயர் மக்களை வரவேற்கிறது. ஆனால், சீனா, ஜப்பான், ரஷ்யா, இந்தியாவின் பொருளாதாரம் தடுமாறுகிறது. காரணம், அந்நாடுகள் புலம்பெயர்பவர்களை வெறுக்கிறது” என்றார். அவரது இந்தக் கருத்து சர்ச்சையை ஏற்படுத்தியது.

இந்நிலையில், பைடனின் கருத்துக்கு இந்திய வெளியுறவுத் துறை அமைச்சர் ஜெய்சங்கர் பதிலளித்துள்ளார். அவர் கூறுகையில், “இந்தியப் பொருளாதாரம் தடுமாற்றத்தில் இல்லை என்பதை முதலில் நான் தெரிவித்துக் கொள்கிறேன்.

இந்தியா எப்போதுமே தனித்துவமான நாடாகவே இருந்து வருகிறது. பல்வேறு சமூகங்களை இந்தியா திறந்த மனதுடன் வரவேற்றிருக்கிறது. பல் வேறு சமூக மக்களும் இந்தியா வந்துள்ளனர்.

அதனால்தான் நாங்கள் குடியுரிமை திருத்தச் சட்டத்தைக் கொண்டு வந்துள்ளோம். சிக்கலில் உள்ள மக்களுக்கு இந்தியாவின் கதவு எப்போதும் திறந்து வைக்கப் பட்டுள்ளது.

நாட்டுக்குள் வர வேண்டியவர்களை வரவேற்கவும், வருவதற்கு உரிமை உள்ளவர்களை வரவேற்கவும் தயாராக இருக்க வேண்டும் என்பதே எங்கள் நோக்கம்” என்றார்.

வலிமையான உறவு: இதனிடையே, அதிபர் ஜோ பைடன் கருத்து குறித்து வெள்ளை மாளிகை விளக்கம் அளித்துள்ளது. “புலம்பெயர்ந்த மக்கள் மூலம் அமெரிக்கா வலிமை பெற்றுள்ளது என்பதை சுட்டிக்காட்டும் விதமாகவே அதிபர் பைடன் அவ்வாறு குறிப்பிட்டுள்ளார்.

இந்தியா மற்றும் ஜப்பானுடன் அமெரிக்கா வலிமையான உறவைக் கொண்டுள்ளது. கடந்த மூன்று ஆண்டுகளில் அந்த நாடுகளுடன் அரசியல்ரீதியிலான உறவுகளில் அதிபர்பைடன் அதிக கவனம் செலுத்தியுள்ளார்’’ என்று வெள்ளை மாளிகையின் செய்தித் தொடர்பாளர் கரீன் ஜீன் பியரி தெரிவித்துள்ளார்.