வேடந்தாங்கல் பறவைகள் சரணாலய ஏரியில் உள்ள மரங்களில் அமர்ந்துள்ள பறவைகள்.
மதுராந்தகம்: வேடந்தாங்கல் சுற்றுப்புறப் பகுதிகளில் கனமழை பெய்தும், பறவைகள் சரணாலய ஏரிக்கு நீர்வரத்து இல்லாமல் வறண்டு காணப்படுகிறது.
இதனால் மரக்கிளைகளில் சிறிய அளவில் கூட்டம், கூட்டமாக அமர்ந்துள்ள பறவைகள், உணவுக்காக அருகில் உள்ள நீர் நிலைகளைத் தேடிச் செல்லும் நிலை உள்ளது.
வடகிழக்கு பருவமழை தொடங்கியுள்ளதால், தமிழகத்தில் பல்வேறு மாவட்டங்களிலும்விட்டு, விட்டு மழை பெய்து வருகிறது.
செங்கல்பட்டு மாவட்டம், மதுராந்தகம், கருங்குழி, வேடந்தாங்கல் மற்றும் அதன் சுற்றுப்புறப் பகுதிகளில் மழை பெய்தும், ஏரிகளுக்கு நீர்வரத்து இல்லை.
இதனால் சுற்றுப்புற கிராமங்களில் உள்ள ஏரிகள் வறண்டு காணப்படுகின்றன. வழக்கமாக ஒவ்வோர் ஆண்டும் வடகிழக்கு பருவமழைக் காலத்தில் பறவைகள் சரணாலயத்தில் உள்ள ஏரிக்கு நீர்வரத்து அதிகளவில் இருக்கும்.
ஆனால் தற்போது பருவமழை தொடங்கி வேடந்தாங்கல் சுற்றுப்புறப் பகுதிகளில் மழை பெய்தும் ஏரிக்கு நீர்வரத்து இல்லாததால் ஏரி வறண்ட நிலையி லேயே உள்ளது.
இந்நிலையில், ஏரியில் உள்ள மரங்களில் ஆங்காங்கே உள்ள பறவைகள் உணவுக்காக வேறு இடங்களைதேடிச் செல்லும் நிலை ஏற்பட்டுள்ளது.
இதனால் வழக்கமான சீசன் தொடங்கியதாகக் கருதி பறவைகளைக் கண்டு ரசிக்க வரும் சுற்றுலாப் பயணிகளும், பறவை ஆர்வலர்களும் ஏமாற்றம் அடைந்து வருகின்றனர்.
