சென்னை: பாரிமுனையில் ஆட்டோ ஓட்டுநரை தாக்கி வழிப்பறியில் ஈடுபட்ட சரித்திரப் பதிவேடு குற்றவாளியை போலீஸார் கைது செய்தனர்.
பெரம்பலூர் மாவட்டத்தைச் சேர்ந்த பழனி என்பவர், சென்னை பிராட்வே பகுதியில் ஆட்டோ ஓட்டி வருகிறார். கடந்த 3-ம் தேதி இரவு, பாரிமுனை என்.எஸ்.சி. போஸ் சாலையில் உள்ள டீக்கடையில் நின்றிருந்தபோது, அங்கு வந்த சோழிங்க நல்லூர், எழில் நகரைச் சேர்ந்த கோபி (27) என்பவர், பழனியிடம் பணம் கேட்டு மிரட்டி உள்ளார். பழனி பணம் தராததால் ஆத்திரமடைந்த கோபி, அவரைத் தாக்கியதுடன், அவர் வைத்திருந்த ரூ.200 பணத்தையும் பறித்துக்கொண்டு கொலை மிரட்டல் விடுத்துச் சென்றுள்ளார்.
இதுகுறித்து பழனி அளித்த புகாரின்பேரில், எஸ்பிளனேடு போலீஸார் வழக்குப் பதிவு செய்து கோபியை நேற்று முன்தினம் கைது செய்தனர். அவர் எஸ்பிளனேடு காவல் நிலையத்தின் சரித்திரப் பதிவேடு குற்றவாளி என்பதும், இவர் மீது கொலை முயற்சி, வழிப்பறி உள்ளிட்ட சுமார் 22 குற்ற வழக்குகள் இருப்பதும் தெரியவந்தது. இதையடுத்து, கைது செய்யப்பட்ட கோபியை விசாரணைக்குப் பின்னர் போலீஸார் சிறையில் அடைத்தனர்.
