ஓசூர் அருகே கஞ்சா கடத்தலில் ஈடுபட்ட வடமாநில தொழிலாளி கைது

ஓசூர்: ஓசூர் அருகே கஞ்சா கடத்தி வந்த வடமாநிலத்தவரை கைது செய்த போலீஸார், அவரது கூட்டாளிகளான 5 பேரை தேடி வருகின்றனர்.

ஓசூர் ஜுஜுவாடி பகுதிக்கு பெங்களூரு நகரிலிருந்து கஞ்சா கடத்தி வருவதாக சிப்காட் காவல் நிலைய உதவி ஆய்வாளருக்கு ரகசிய தகவல் கிடைத்தது. அத்தகவலின் அடிப்படையில் சிப்காட் போலீஸார் ஜுஜுவாடி சாலை சந்திப்பில் வாகனச் சோதனை மேற்கொண்டனர்.

அப்போது அந்த வழியாக இருசக்கர வாகனத்தில் வந்த நபரைப் பிடித்து சோதனை மேற்கொண்டனர். சோதனையில் இருசக்கர வாகனத்தில் 2 கிலோ எடையுள்ள கஞ்சாவை மறைத்து வைத்திருப்பது கண்டுபிடிக்கப்பட்டது. மேலும் போலீஸாரின் விசாரணையில் கஞ்சா கடத்தி வந்தவர் அசாம் மாநிலத்தைச் சேர்ந்த பிங்கு ட்யாஸ் (22) என்பதும், இவர் ஜுஜுவாடி கோட்டைநகர் பகுதியில் தங்கி தனியார் நிறுவனத்தில் வெல்டராக பணியாற்றி வருவதும் தெரியவந்தது.

அதைத்தொடர்ந்து பிங்கு ட்யாஸ்சை கைது செய்த போலீஸார், அவரிடமிருந்து 2 கிலோ கஞ்சா மற்றும் இருசக்கர வாகனத்தையும் பறிமுதல் செய்தனர். கஞ்சா கடத்தல் தொடர்பாக தலைமறைவான விக்கி, ஜோகீர், ஸ்மித், கைலாய், உத்தம் ஆகிய 5 பேரை போலீஸார் தேடி வருகின்றனர். இதுகுறித்து சிப்காட் போலீஸார் வழக்குப் பதிவு செய்து விசாரணை நடத்தி வருகின்றனர்.