ராஜ்குமார் பெரியசாமி இயக்கத்தில் தனுஷ் நடித்துள்ள திரைப்படம் ‘ஓம்’. இதில் மம்மூட்டி, நஸ்ருதீன் ஷா, இந்திரன்ஸ், சாய் பல்லவி, ஸ்ரீலீலா உள்பட பலர் நடித்துள்ளனர். இப்படத்தின் பாடல் வெளியீட்டு விழா சென்னையில் நேற்று முன் தினம் நடைபெற்றது. மம்மூட்டி உள்பட படக்குழுவினர் கலந்துகொண்டனர்.
விழாவில் ஏராளமான ரசிகர்கள் திரண்டதால் கூட்ட நெரிசல் ஏற்பட்டது. தனுஷ் அரசியலுக்கு வர இருப்பதாகக் கூறப்படும் நிலையில் அரசியல் கட்சிக்கு இணையாக தனுஷின் பிரம்மாண்ட கட்அவுட்களும் பேனர்களும் விழா நடைபெறும் இடத்துக்கு அருகே வைக்கப்பட்டிருந்தன.
விழாவில் தனுஷ் பேசும்போது கூறியதாவது: என் ரசிகர்கள், நான் சொன்னேன் என்பதற்காகப் பல ஊர்களில் நலத்திட்ட உதவிகளைச் செய்து வருகிறார்கள். அதைப் பார்க்கும்போது எனக்கு பெருமையாக இருக்கிறது.
என்னைக் குறைத்து எடை போட்டு, மட்டம் தட்டி, நான் நடிக்க வந்ததில் இருந்து இப்போதுவரை அப்படியே பண்ணிக் கொண்டிருக்கிறார்கள். என்னை அவர்கள் குறைத்து எடை போடப் போட, மட்டம் தட்டத் தட்ட, அவர்களுக்கே தெரியாமல் என்னை ஊக்கப்படுத்திக் கொண்டிருக்கிறார்கள். யாரும் எதிர்பார்க்காத நேரத்தில் திடீரென்று மேலே வந்து ஒரு அடி அடித்தால் அதில் கிக் இருக்கிறது.
எப்படி காற்றுள்ள பந்தைத் தண்ணீருக்குள் அமுக்கி வைக்க முடியாதோ, எப்படி உங்கள் மொபைல் பாஸ்வேர்டை உங்கள் தோழியிடம் ரொம்ப நாள் மறைக்க முடியாதோ, இறையருள் இருக்கும் வரைக்கும் கடினமான உழைப்பு இருக்கும் வரைக்கும் என் ரசிகர்கள் ஒவ்வொருவரும் ஒரு தீப்பந்தமாக எனக்கு வழிகாட்டுகிற வரைக்கும் என் வழியில் அமைதியாகப் போய்க் கொண்டிருப்பேன். எது செய்தாலும் நான் என் மனசாட்சிக்கு நியாயமாகச் செய்வேன்.
ஒரு போதும் உங்களைத் தலைகுனிய வைக்கமாட்டேன். சமீபகாலமாக என்னை, அவர் இயக்குகிறார், இவர் இயக்குகிறார் என்று சொல்லிக்கொண்டிருக்கிறார்கள். என்னை யாரும் இயக்கவில்லை. என்னை இயக்குவது இறைவன்தான். என் பின்னால் இருப்பது ரசிகர்கள். மக்கள் என் பக்கம். இவ்வாறு தனுஷ் பேசினார்.
பின்னர் அவரிடம் கேட்கப்பட்ட கேள்விகளுக்குப் பதில் சொல்லும்போது, “தமிழ்நாடு முழுவதும் ஏ.சி. டியூசன் சென்டர்கள் தொடங்கப்படும். இன்னும் சில நாட்களில் சென்னையில் 3 இடங்களிலும், கன்னியாகுமரியில் ஓர் இடத்திலும் தொடங்கப்பட இருக்கிறது. அரசியல் பற்றி கேட்கிறார்கள். எல்லோருக்கும் கண்டிப்பாகத் தெரிய வேண்டிய, அறிய வேண்டிய உணர்வு அரசியல்” என்றார்.
