தீபாவளியும் தசராவும் வாசலில் நின்றுகொண்டு இனிப்புகளின் வருகைக்காகக் காத்திருக்கும் வேளையில், சர்க்கரையின் விலை மட்டும் ராக்கெட் வேகத்தில் உயர்ந்து வருகிறது. கிலோ ரூ.60-க்கு மேல் உயர்ந்து நிற்கும் சர்க்கரை விலை, எளிய மனிதர்களின் பண்டிகைக் கனவைக் கசப்பாக்கியுள்ளது.
இனிப்புத் தயாரிப்பாளர்களுக்கு இந்த ஆண்டு தீபாவளி வர்த்தகம் பெரும் சவாலாக மாறக்கூடும். ஏனென்றால், சர்க்கரை விலை உயர்வோடு நெய், சமையல் எண்ணெய், பருப்பு வகைகள் மற்றும் உலர் பழங்களின் விலையும் சேர்ந்துள்ளதால், இனிப்பு வகைகளின் தயாரிப்புச் செலவு 15% வரை அதிகரித்துள்ளது.
பொதுமக்கள் இனிப்பு வாங்கும் அளவைக் குறைப்பார்களா? கடைகளின் லாபம் சரியுமா என்ற அச்சத்தில் இனிப்பு வணிக உலகம் உறைந்துபோய் உள்ளது. சர்க்கரை உற்பத்தியில் உண்மையிலேயே பற்றாக்குறையா அல்லது பதுக்கலா? சர்க்கரை சந்தையில் நடப்பது என்ன? - இதோ ஒரு தெளிவுப் பார்வை.
சர்க்கரை விலை உயர்வு எவ்வளவு?
இந்தியாவில் சர்க்கரையின் விலை நாளுக்கு நாள் உயர்ந்து வருகிறது. அக்டோபர் இரண்டாவது வாரத்தில் மட்டும் சர்க்கரை விலை 13 சதவீதத்துக்கு மேல் உயர்ந்துள்ளது. சில்லறை விற்பனை விலை சராசரியாக 8 சதவீதம் முதல் 16 சதவீதம் வரை அதிகரித்துள்ளது.
சில்லறை விலை நிலவரம்:
கடந்த ஜூலை, ஆகஸ்ட் மாதங்களில் ஒரு கிலோ ரூ.45 – ரூ.48 என இருந்த சர்க்கரை விலை, தற்போது ரூ.52 - ரூ.58 வரை எட்டியுள்ளது. சில உள்ளூர் சில்லறை விற்பனைச் சந்தைகளில் அதிகபட்சமாக ரூ.66 வரை விற்கப்படுகிறது.
மொத்த விற்பனை நிலவரம்:
உத்தரப் பிரதேசத்தில் சர்க்கரை விலை குவிண்டாலுக்கு 13% உயர்ந்து, தரத்துக்கு ஏற்ப ரூ.5,254 முதல் ரூ.5,725 வரை விற்கப்படுகிறது (கடந்த வாரம் இது ரூ.4,600 ஆக இருந்தது). மகாராஷ்டிராவிலும் சர்க்கரை விலை ஒரு வாரத்தில் 17% அதிகரித்து குவிண்டாலுக்கு ரூ.5,100 ஆக உயர்ந்துள்ளது.
பண்டிகைக் காலத் தேவை அதிகரித்ததால், மொத்த விற்பனைச் சந்தைகளில் குவிண்டாலுக்கு ரூ.100 முதல் ரூ.200 வரை உயர்ந்து, சில்லறை விலையில் கிலோவுக்கு ரூ.2 முதல் ரூ.4 வரை உடனடி உயர்வு காணப்படுகிறது.
இந்தியாவில் சர்க்கரை பயன்பாடு
இந்தியாவில் ‘ஸ்வீட் மார்க்கெட்’ எனப்படும் இனிப்புச் சந்தை மிகப் பெரிய வர்த்தகத் துறையாகும். இதன் சந்தை மதிப்பு ஆண்டுக்கு சுமார் ரூ.10,44,592 கோடி (110 பில்லியன் டாலர்) என மதிப்பிடப்பட்டுள்ளது. இதில் பண்டிகைக் காலத்தில் மட்டும் 40% அளவுக்கு இனிப்பு விற்பனை நடைபெறுகிறது.
உலகிலேயே சர்க்கரையை அதிகமாக நுகரும் நாடாகவும், இரண்டாவது அதிகமாக உற்பத்தி செய்யும் நாடாகவும் இந்தியா திகழ்கிறது. உலகளவில் சர்க்கரை உற்பத்தியில் 20% இந்தியாவில் நடைபெற்றாலும், நுகர்விலும் இந்தியாவே முதலிடத்தில் உள்ளது.
ஒவ்வொரு ஆண்டும் இந்திய மக்கள் 29 மில்லியன் மெட்ரிக் டன் முதல் 32 மில்லியன் மெட்ரிக் டன் வரை சர்க்கரையைப் பயன்படுத்துகின்றனர். இது உலகளாவிய நுகர்வில் 15 சதவீதமாகும்.
உற்பத்தி மற்றும் இருப்பு நிலவரம்:
கரும்பு மற்றும் சர்க்கரை உற்பத்தியில் மகாராஷ்டிரா, உத்தரப் பிரதேசம், மற்றும் கர்நாடகா ஆகிய மூன்று மாநிலங்களே முன்னணியில் உள்ளன.
உற்பத்தி சரிவு:
நடப்பு ஆண்டில் மத்திய அரசு சர்க்கரை உற்பத்தியை 343 லட்சம் டன்னாக உயர்த்த இலக்கு வைத்திருந்தது. ஆனால், போதிய மழையின்மையால் உற்பத்தியானது 306 லட்சம் டன்களாகச் சரிந்துள்ளது. இது கடந்த ஆண்டுகளை விட சுமார் 11% - 12% குறைவு.
கையிருப்புப் பற்றாக்குறை: நாட்டின் வருடாந்திர நுகர்வுக்குச் சுமார் 280 லட்சம் டன் சர்க்கரை தேவைப்படுகிறது. தற்போது உற்பத்தி போதுமானதாக இருந்தாலும், வழக்கமாக இருக்க வேண்டிய கையிருப்பை (Buffer Stock) விட 30 லட்சம் டன் குறைவாக இருப்பதே தற்போதைய சந்தைப் பதற்றத்துக்கு முக்கியக் காரணம்.
விலை உயர்வுக்கு முதன்மைக் காரணங்கள்
பருவமழை பொய்த்தலும் பயிர் நோய்களும்: முக்கிய கரும்பு உற்பத்தி மாநிலங்களான மகாராஷ்டிரா, கர்நாடகா மற்றும் உத்தரப் பிரதேசத்தில் போதிய மழையின்மை, வெள்ளப் பெருக்கு மற்றும் கரும்பைத் தாக்கிய ‘சிவப்பு அழுகல் நோய்’ (Red Rot) மற்றும் பூச்சிகளால் கரும்பு மகசூல் பெருமளவில் பாதிக்கப்பட்டதே முதன்மைக் காரணம்.
பண்டிகைக் காலத் தேவை: ஓணம், நவராத்திரி, தசரா மற்றும் தீபாவளி போன்ற தொடர் பண்டிகைகளால் இனிப்புத் தயாரிப்பாளர்கள் மற்றும் பான நிறுவனங்களின் சர்க்கரைத் தேவை திடீரென அதிகரித்துள்ளது.
தேவையைக் கணிக்காத ஏற்றுமதி: உற்பத்தி குறைவதை முன்கூட்டியே கணிக்காமல், ஆண்டின் தொடக்கத்தில் சுமார் 8 லட்சம் டன் சர்க்கரை ஏற்றுமதி செய்யப்பட்டது உள்நாட்டு கையிருப்பைக் குறைத்தது.
சர்வதேச சந்தை விலை உயர்வு: உலகளாவிய சர்க்கரை பற்றாக்குறையால் சர்வதேச சந்தையிலும் சர்க்கரை விலை 16% வரை உயர்ந்துள்ளது.
எத்தனால் தயாரிப்பு பற்றிய விவாதம்: கரும்பு சாறு எத்தனால் உற்பத்திக்குத் திருப்பப்பட்டதே விலையேற்றத்துக்கு காரணம் என்ற குற்றச்சாட்டை அரசு மறுத்துள்ளது. எத்தனாலுக்கான கரும்புப் பயன்பாடு 12%-லிருந்து 9%-ஆகக் குறைந்துள்ளதாகவும், பெரும்பாலான எத்தனால் தானியங்களிலிருந்தே தயாரிக்கப்படுவதாகவும் அரசு தெளிவுபடுத்தியுள்ளது.
மத்திய அரசு விளக்கம்
கரும்பு விளைச்சல் பாதிப்பு மற்றும் சர்க்கரை உற்பத்தி குறைவு குறித்து மத்திய அரசு அளித்துள்ள விளக்கத்தில், ‘அக்டோபர் 2-வது வாரத்தில் கையிருப்பில் இருந்து 14 லட்சம் டன் சர்க்கரையைச் சந்தையில் புழக்கத்தில் விடுகிறோம். மேலும் 10 லட்சம் மெட்ரிக் டன் கச்சா சர்க்கரையைச் சுங்க வரியின்றி பிரேசில் மற்றும் தாய்லாந்தில் இருந்து இறக்குமதி செய்ய அனுமதி அளிக்கப்பட்டுள்ளது’ எனத் தெரிவிக்கப்பட்டுள்ளது.
தீபாவளிக்குள் விலை குறைய வாய்ப்புள்ளதா?:
பண்டிகைக் காலத் தேவை உச்சத்தில் இருப்பதால், தீபாவளி வரை சர்க்கரை விலை உடனடியாகக் குறைய வாய்ப்பில்லை. சர்க்கரை விலை உயர்வோடு சேர்த்துச் சமையல் எண்ணெய், நெய், முந்திரி (+4%) மற்றும் உலர் திராட்சை (+10.4%) போன்ற மூலப் பொருட்களின் விலையும் உயர்ந்துள்ளதால், இனிப்புகளின் விலை 10% முதல் 15% வரை உயர்த்தப்பட வாய்ப்புள்ளதாக வர்த்தகர்கள் தெரிவித்துள்ளனர்.
எனவே, இந்தத் தீபாவளிப் பண்டிகைக் காலம் வரை சர்க்கரை மற்றும் இனிப்புகளின் விலை உயர்வாகவே நீடிக்கும் என்பதால், பொதுமக்கள் தங்களின் பண்டிகைப் பட்ஜெட்டைச் சற்றே திட்டமிட்டு அமைப்பதே அவசியமாகும்.