புதுடெல்லி: இந்தியாவில் 100% சுத்தமான எத்தனாலில் இயங்கக்கூடிய ‘ஃப்ளெக்ஸ் ஃபியூல்’ வாகனங்களின் பயன்பாட்டுக்கு அனுமதி அளிக்கும் வகையில் மத்திய மோட்டார் வாகன விதிகளில் திருத்தங்களை் செய்து மத்திய சாலைப் போக்குவரத்து மற்றும் நெடுஞ்சாலைத்துறை அமைச்சகம் அதிகாரப்பூர்வ அறிவிப்பை வெளியிட்டுள்ளது.
வெளிநாடுகளிலிருந்து கச்சா எண்ணெய் இறக்குமதி செய்வதைக் குறைக்கவும், தற்போதைய மத்திய கிழக்கு நாடுகளின் போரினால் உருவாகியுள்ள ஆற்றல் நெருக்கடியைச் சமாளிக்கவும் மத்திய அரசு இந்த முக்கிய முடிவை எடுத்துள்ளது.
அதன்படி, 100% எத்தனால் அல்லது அதிகளவிலான எத்தனால் கலந்த பெட்ரோலால் (E20 முதல் E100 வரை) இயங்கும் வகையில் வடிவமைக்கப்பட்ட பிரத்யேக வாகனங்களுக்கு மட்டுமே இந்த அனுமதி பொருந்தும். சாதாரண பெட்ரோல் அல்லது E20 (20% எத்தனால் கலந்த பெட்ரோல்) இன்ஜின் கொண்ட வாகனங்களில் E85 அல்லது E100 எரிபொருளைப் பயன்படுத்த முடியாது என்று நெடுஞ்சாலை துறை அமைச்சகத்தின் மூத்த அதிகாரி தெளிவுபடுத்தியுள்ளார்.
