கடந்த சில நாட்களாக பெய்து வரும் கனமழை காரணமாக திருச்சி மாவட்டம் எளமனூர், கொடியாலம் பகுதியில் நீரில் மூழ்கியுள்ள விளைநிலங்கள்.
மயிலாடுதுறை/ தஞ்சாவூர்/ திருவாரூர்: வடகிழக்குப் பருவ மழை மற்றும் வங்கக் கடலில் உருவாகியுள்ள புயல் சின்னம் காரணமாக டெல்டா மாவட்டங்களில் கடந்த சில நாட்களாக பலத்த மழை பெய்து வருகிறது. இதில், 6,000 ஏக்கர் நெல் வயல்கள் மழைநீரில் மூழ்கியுள்ளதால் விவசாயிகள் கவலை அடைந்துள்ளனர்.
மயிலாடுதுறை மாவட்டத்தில் நிகழாண்டு 1.60 லட்சம் ஏக்கரில் சம்பா, தாளடி நெல் சாகுபடி செய்ய இலக்கு நிர்ணயிக்கப்பட்ட நிலையில், இதுவரை 1 லட்சம் ஏக்கர் சாகுபடி பணிகள் நிறைவடைந்துள்ளன. இந்நிலையில், தொடர்ந்து கனமழை பெய்து வருவதால் மயிலாடுதுறை மாவட்டத்தில் மயிலாடுதுறை, திருவிழந்தூர், பல்லவராயன்பேட்டை, பொன்னூர், பாண்டூர், திருவெண்காடு, மங்கைமடம், கொள்ளிடம், செம்பனார்கோவில் வட்டாரங்களில் பல்வேறு கிராமங்களில் 5,000 ஏக்கர் இளம் பயிர்கள் நீரில் மூழ்கியுள்ளன.
வடிகால் வாய்க்கால்கள், ஆறுகள் முறையாக தூர் வாராததால் பல இடங்களில் இளம் பயிர்கள் மழைநீரில் மூழ்கியுள்ளதாகவும், பல ஆறுகளில் ஆகாயத்தாமரை செடிகள் மண்டியுள்ளதால் நீரோட்டம் தடைபட்டுள்ளதாகவும் விவசாயிகள் புகார் தெரிவிக்கின்றனர்.
இதேபோல, தஞ்சாவூர் மாவட்டம் திருவையாறு வட்டாரத்துக்கு உட்பட்ட விளாங்குடி, வில்லியநல்லூர், செம்மங்குடி, தென்கச்சி போன்ற பகுதியில் 500 ஏக்கரில் நடவு செய்யப்பட்ட வயல்களில் மூன்றடி உயரத்துக்கு மழைநீர் தேங்கியுள்ளதால் பயிர்கள் அழுகும் நிலை ஏற்பட்டுள்ளது. இதேபோல, 100 ஏக்கர் நாற்றங்கால் வயலிலும் மழைநீர் தேங்கியுள்ளதால் விவசாயிகள் கவலை அடைந்துள்ளனர்.
இதுகுறித்து விவசாயிகள் கூறுகையில், “சென்னையில் பருவமழை தொடங்கும் முன்பே முன்னெச்சரிக்கை நடவடிக்கைகளை எடுக்கும் தமிழக அரசு, டெல்டா பகுதியில் அலட்சியம் காட்டுகிறது. தற்போது வரை ஏக்கருக்கு ரூ.20 ஆயிரம் வரை செலவழித்து நடவு செய்யப்பட்ட பயிர்கள் நீரில் மூழ்கியுள்ளதால் என்ன செய்வதென்று தெரியவில்லை. பயிர்கள் பாதிக்கப்பட்ட வயல்களை கணக்கெடுத்து மாவட்ட நிர்வாகம் நிவாரணம் வழங்க வேண்டும்” என்றனர்.
இதேபோல, திருவாரூர் மாவட்டம் குடவாசல் அருகே 500 ஏக்கர் சம்பா நெற்பயிர்கள் மழைநீரில் மூழ்கியுள்ளன. குறிப்பாக குடவாசல் அருகே அரசூர், மேலப்பாளையூர், ஓகை உள்ளிட்ட பகுதிகளில் 30 நாட்கள் ஆன பயிர்கள் அனைத்தும் மழைநீரில் மூழ்கியுள்ளன. ஏக்கருக்கு இதுவரை ரூ.10,000 வரை செலவு செய்துள்ள நிலையில், தொடர்ந்து மழை பெய்து வருவதால் நெற்பயிர்கள் அழுகும் நிலை ஏற்பட்டுள்ளதாக விவசாயிகள் கவலை தெரிவித்தனர்.
இதுகுறித்து வேளாண்மைத் துறை அலுவலர்கள் கூறியது: மழை தொடர்ந்து பெய்து வருவதால் சில இடங்களில் வயல்களில் மழைநீர் தேங்கியுள்ளது. மழை பாதிப்பு குறித்து வேளாண் துறையினர் உரிய ஆய்வு செய்து, அரசின் கவனத்துக்குக் கொண்டு செல்லப்படும் என்றனர்.
