Published : 17 Apr 2016 11:47 am

Updated : 17 Apr 2016 11:49 am

 

Published : 17 Apr 2016 11:47 AM
Last Updated : 17 Apr 2016 11:49 AM

வின்சென்ட் விகில்ஸ்வொர்த் 10

10

பூச்சியினங்கள் குறித்த பல அரிய உண்மைகளை உலகுக்கு எடுத்துக் கூறிய இங்கிலாந்து பூச்சியியல் வல்லுநர் சர் வின்சென்ட் விகில்ஸ்வொர்த் (Sir Vincent Wigglesworth) பிறந்த தினம் இன்று (ஏப்ரல் 17). அவரைப் பற்றிய அரிய முத்துக்கள் பத்து:

* இங்கிலாந்தின் லங்காஷயர் கவுன்டியில் உள்ள கிர்க்ஹாம் நகரில் (1899) பிறந்தார். தந்தை மருத்துவர். மருத்துவம் படிக்க கல்லூரியில் சேர்ந்தார். ஆனால், கல்வி உதவித்தொகை பெற்று கேம்பிரிட்ஜ் பல்கலைக்கழகத்தில் சில ஆராய்ச்சிகளை மேற்கொள்ளத் தொடங்கினார்.


* அவரது பேராசிரியர் கூறியபடி, கரப்பான் பூச்சி குறித்த ஆராய்ச்சியில் இறங்கினார். அதன் பிறகுதான், பூச்சிகள் உலகின் மீது இவருக்கு ஆர்வம் பெருக்கெடுத்தது. பூச்சிகளின் உடல் அமைப்பு, திசுக்கள், உறுப்புகள் தொடர்பாக பல்வேறு ஆராய்ச்சிகளில் ஈடுபட்டார்.

* பூச்சிகளின் உடற்கூறியல் தொடர்பான இவரது ஆய்வுகள் பூச்சியியல் துறையின் அடித்தளமாக கருதப்படுகின்றன. கேம்ப்ரிட்ஜ் பல்கலைக்கழகத்திலும் லண்டன் செயின்ட் தாமஸ் மருத்துவமனையிலும் உயர் கல்வியை முடித்தார்.

* முதல் உலகப்போரின்போது, ராணுவத்தில் பணிபுரிந்தார். லண்டன் ஸ்கூல் ஆஃப் ஹைஜீனில் விரிவுரையாளராகப் பணியாற்றினார். அடுத்து, லண்டன் பல்கலைக்கழகம் மற்றும் கேம்பிரிட்ஜ் பல்கலைக்கழகத்தில் பூச்சியியல் துறையில் பணியாற்றினார். கேம்பிரிட்ஜில் உள்ள பூச்சி உடலியல் பிரிவின் வேளாண்மை ஆராய்ச்சி கவுன்சில் இயக்குநராக நியமிக்கப்பட்டார்.

* பூச்சிகளின் உருமாற்றம் குறித்த இவரது கண்டுபிடிப்பு மிகவும் முக்கியத்துவம் வாய்ந்தது. தென் அமெரிக்காவில் காணப்படும் ரத்தம் உறிஞ்சும் பூச்சிகளில் ஒரு முக்கியமான வளர்ச்சி ஹார்மோன், அதன் மூளைச் செல்களில் உள்ள நரம்புச் சுரப்பிகளில் உற்பத்தியாகிறது என்பது இவரது ஆய்வில் தெரியவந்தது.

* சில பூச்சிகள் ஒரு குறிப்பிட்ட வளர்ச்சி நிலையை எட்டும்வரை, முதிர்ச்சிக்கான அம்சங்கள் அதன் உடலில் ஏற்படாதவாறு வேறு சில ஹார்மோன்கள் தடுக்கின்றன என்பதையும் கண்டுபிடித்தார். அதற்கு ‘ஜுவனைல் ஹார்மோன்’ எனப் பெயரிட்டார்.

* பூச்சியின உருமாற்றம் தொடர்பாக தெளிவான கோட்பாட்டை உருவாக்கினார். பூச்சிகளின் அமைப்பியல் மற்றும் வளர்ச்சிப் பண்புகளை அவற்றின் மரபணு கூறுகளின் ஹார்மோன்கள் தீர்மானிக்கின்றன என்பதையும் கண்டறிந்தார்.

* ‘இன்செக்ட் ஃபிசியாலஜி’ என்ற நூலை 1934-ல் எழுதினார். இது இன்றளவும் பூச்சியியல் துறை மாணவர்களுக்கான வழிகாட்டி நூலாகத் திகழ்கிறது. 1939-ல் இவர் எழுதிய ‘தி பிரின்சிபல்ஸ் ஆஃப் இன்செக்ட் ஃபிசியாலஜி’ என்ற நூல் அத்துறையில் ஆராய்ச்சி செய்பவர்களுக்கு இன்றியமையாத நூலாக கருதப்படுகிறது. தன் ஆராய்ச்சிகள் குறித்து 300 கட்டுரைகள் எழுதி வெளியிட்டார். இவரது அனைத்து நூல்களுமே உலகம் முழுவதும் பிரபலமடைந்தன.

* உலகம் முழுவதும் உள்ள ஏராளமான கல்லூரிகள், பல்கலைக்கழகங்களில் விரிவுரைகள் ஆற்றினார். பயன்பாட்டு உயிரியல் சங்கத்தின் தலைவராக நியமிக்கப்பட்டார். லண்டன் ராயல் சொசைட்டியின் உறுப்பினராகத் தேர்ந்தெடுக்கப்பட்டார். 1964-ல் இவருக்கு ‘சர்’ பட்டம் வழங்கப்பட்டது. இது தவிர, ஏராளமான பட்டங்கள், விருதுகளைப் பெற்றுள்ளார்.

* பூச்சிகள் பற்றிய ஆராய்ச்சிகள் பன்னெடுங்காலமாக நடக்கின்றன. ஆனால், பூச்சிகளின் உடற்கூறியல் குறித்து ஆராய்ந்து, அதற்கென்ற ஒரு புதிய அறிவியல் துறைக்கு அடித்தளமிட்ட வின்சென்ட் விகில்ஸ்வொர்த் 95-வது வயதில் (1994) மறைந்தார்.

வின்சென்ட் விகில்ஸ்வொர்த்பூச்சியியல் வல்லுநர்முத்துக்கள் பத்து

Sign up to receive our newsletter in your inbox every day!

You May Like

More From This Category

More From this Author

10

பாப்பா உமாநாத் 10

வலைஞர் பக்கம்
10

மே.வீ.வேணுகோபாலன் 10

வலைஞர் பக்கம்
10

ஹோமி சேத்னா 10

வலைஞர் பக்கம்
x