தனியார் பள்ளிகளில் 25% இலவச மாணவர் சேர்க்கை; அக்.7-க்குள் சேரவேண்டும்: தனியார் பள்ளிகள் இயக்ககம் 

கட்டாயக் கல்வி உரிமைச் சட்டப்படி, இலவச மாணவர் சேர்க்கையில் இடம் கிடைக்கும் மாணவர்கள் அக்டோபர் 7-ம் தேதிக்குள் பள்ளிகளில் சேரவேண்டும் என்று தனியார் பள்ளிகள் இயக்ககம் அறிவித்துள்ளது.

இதுகுறித்துத் தனியார் பள்ளிகள் இயக்ககம் இன்று வெளியிட்ட செய்திக்குறிப்பு:

''இலவச மற்றும் கட்டாயக் கல்வி உரிமைச் சட்டப்படி தனியார் பள்ளிகளில் 25 சதவீத இடங்கள், பொருளாதாரத்தில் பின்தங்கிய மாணவர்களுக்கு ஒதுக்கப்படுகின்றன. ஒவ்வொரு பள்ளியிலும் நுழைவு நிலை வகுப்பில், இந்தச் சட்டத்தில் மாணவர்கள் சேர்க்கப்படுகின்றனர்.

இதற்கான ஆன்லைன் விண்ணப்பப் பதிவு ஆக.27-ம் தேதி தொடங்கியது. இதற்கு செப்.25-ம் தேதி வரை rte.tnschools.gov.in என்ற இணையதளத்தின் வழியே விண்ணப்பிக்கலாம்.

விண்ணப்பப் பரிசீலனைக்குப் பின் 30-ம் தேதி மாலை 5 மணிக்கு விண்ணப்பங்களின் விவரங்கள், பள்ளிகளின் தகவல் பலகையில் வெளியிடப்படும்.

நிர்ணயிக்கப்பட்ட இடங்களை விடக் கூடுதல் விண்ணப்பங்கள் வந்தால், அக்.1-ம் தேதி முதல் குலுக்கல் நடத்தப்பட்டு, மாணவர்கள் தேர்வு செய்யப்படுவர். தேர்வாகும் மாணவர்கள், அக்.7-ம் தேதிக்குள் சம்பந்தப்பட்ட பள்ளிகளில் சேர வேண்டும்.

அக்டோபர் 7-ம் தேதி நிலவரப்படி சேர்க்கை முடிந்த இடங்கள் போக மீத இடங்கள் இருந்தால், அவை நவ.15-ம் தேதி வரை காலியாக வைக்கப்பட்டிருக்கும். அதை நிரப்புவது குறித்துப் பின்னர் அறிவிப்பு வெளியாகும்.

இதுகுறித்துப் புகார்கள் இருந்தால், மாவட்ட முதன்மைக் கல்வி அலுவலர் மற்றும் தனியார் பள்ளி இயக்குனர் தலைமையிலான குழுவிடம் தெரிவிக்கலாம்''.

இவ்வாறு தனியார் பள்ளிகள் இயக்ககம் தெரிவித்துள்ளது.