நீங்களே செய்யலாம்: அலங்காரக் குடை செய்வோமா?

விநாயகர் சதுர்த்தி அன்று சந்தையில் சாமி குடை விற்பதைப் பார்த்திருக்கிறீர்களா? அந்தக் குடையை நீங்களே செய்யலாம். செய்து பார்க்க நீங்கள் தயாரா?

தேவையான பொருள்:

அட்டை, போஸ்டர் வண்ணக் காகிதங்கள் (ஒரு பக்கம் வண்ணமாகவும், மறுபக்கம் வெள்ளையாகவும் இருக்கும்), காம்பஸ், கத்தரிக்கோல், பசை, ஒன்றரை அடி மூங்கில் குச்சி, சார்ட் காகிதம், சிறிய அட்டைப் பெட்டியில் ஈரக் களிமண், வண்ண பிளாஸ்டிக் மணி.

செய்வது எப்படி?

1 அட்டையில் 25 செ.மீ. விட்டம் அளவுக்குக் காம்பஸ் கொண்டு வட்டம் வரையுங்கள். அதை வெட்டி எடுத்துக்கொள்ளுங்கள். அதன் இரு பக்கமும் அதே அளவு போஸ்டர் வண்ணக் காகிதத்தை ஒட்டி நன்றாகக் காய வையுங்கள்.

2 அட்டை காய்ந்த பிறகு அதில் ஒரு பக்கம் கூர்மையாகச் சீவி வைத்திருக்கும் மூங்கில் குச்சியை நடுவில் செருகுங்கள். படம் 2-ல் காட்டியபடி முக்கால் பாகம் பிடியாகவும் எஞ்சிய மீதி பகுதி மேல் பக்கம் இருக்குமாறும் வைக்க வேண்டும். குச்சி மேலும் கீழும் நகராமல் இருக்க, வெள்ளைத் தாளை நாடா போல் கத்தரித்துக்கொள்ளுங்கள். அதை அட்டையும் குச்சியும் சேர்ந்திருக்கும் இடத்தில் சுருட்டி பசையால் ஒட்டிவிடுங்கள்.

3 அது நன்கு காய்ந்ததும், சார்ட் பேப்பரை ஒன்றரை அங்குலம் அகலத்தில் நாடா போல் வெட்டுங்கள். அதை வட்ட அட்டையின் ஓர விளிம்பில் படம் 3-ல் காட்டியபடி பசையைக் கொண்டு ஒட்டி காய வையுங்கள்.

4 பிறகு போஸ்ட்டர் வண்ணக் காகிதத்தில் 11*11 செ.மீ. அளவில் தேவைக்கு ஏற்ப 10 அல்லது 15 வெட்டி எடுத்துக்கொள்ளுங்கள்.

5 அதனைப் படம் 6-ல் காட்டியபடி சுருட்டி ஒட்டி காயவையுங்கள்.

6 படம் 7-ல் காட்டியது போல் ஒவ்வொரு சுருளையும் விளிம்பு பட்டையில் 0.5 செ.மீ. இடைவெளி விட்டு ஒட்டி காயவையுங்கள்.

7 பிறகு போஸ்ட்டர் வண்ணக் காகிதத்தில் 0.5 செ.மீ. அகலத்தில் நீண்ட பட்டைகளாகக் காகிதங்களை நிறைய வெட்டிக்கொள்ளுங்கள். படம் 8-ல் காட்டியது போல இந்தப் பட்டைகளை ஒவ்வொன்றாக ஒவ்வொரு சுருளுக்கும் இடையிடையே ஒட்டி அதன் மறு முனையைக் கூரிய மூங்கில் குச்சியின் முனையில் சுருட்டி ஒட்டுங்கள்.

8 குச்சியின் கீழ்ப் பகுதியில் வேறு வண்ணப் பட்டை காகிதத்தை வெட்டி குச்சியைச் சுற்றிச் சுற்றி ஒட்டுங்கள்.

ஈரக் களிமண் அட்டைப் பெட்டியில் செருகி வண்ண மணியை உச்சியில் ஒட்டுங்கள். இப்போது அழகிய குடை தயார்.