62 ரயில்கள் மூலம் தமிழகத்தில் 4,500 டன் ஆக்சிஜன் விநியோகம் :

தமிழகத்துக்கு நேற்று வரை இயக்கப்பட்ட 62 ரயில்கள் மூலம் 4,500 டன் ஆக்சிஜன் விநியோகம் செய்யப்பட்டுள்ளது.

இந்தியாவில் தமிழகம் உள்ளிட்ட பல்வேறு மாநிலங்களில் கரோனா தொற்றின் 2-வது அலை மிகத் தீவிரமாக பரவிவந்தது. தொற்றால் பாதிக்கப்பட்டவர்களுக்குத் தேவையான ஆக்சிஜன், மத்திய அரசு ஏற்பாட்டில் ரயில்வே மூலம் கொண்டு செல்லப்படுகிறது.

குறிப்பாக, கடந்த மே 14-ம் தேதி முதல் பல்வேறு மாநிலங்களில் இருந்து தமிழகத்துக்கு ஆக்சிஜன் ரயில்கள் தொடர்ந்து இயக்கப்பட்டு வருகின்றன. இதற்கிடையே, சத்தீஸ்கரில் இருந்து வந்த 59-வது ஆக்சிஜன் ரயில் (113.79 டன்) சென்னை துறைமுகத்துக்கும், 60-வது ஆக்சிஜன் ரயில் (126.91 டன்) ஒடிசாவில் இருந்து தண்டையார்பேட்டைக்கும் நேற்று வந்தன.

இதேபோல, ஒடிசாவில் இருந்து வந்த 61-வது ஆக்சிஜன் ரயில் (86.22 டன்) சேலத்துக்கும், 62-வது ஆக்சிஜன் ரயில் (81.64 டன்) கோவைக்கும் சென்றன.

தமிழகத்துக்கு இதுவரை 62 ஆக்சிஜன் ரயில்கள் மூலம் மொத்தம் 4,500 டன் ஆக்சிஜன் வந்துள்ளது. இதில், சென்னை தண்டையார்பேட்டைக்கு மட்டும் அதிகபட்சமாக 28 ஆக்சிஜன் ரயில்கள் வந்துள்ளதாக தெற்கு ரயில்வே தெரிவித்துள்ளது.