துப்பாக்கியுடன் திரிந்த இருவர் கைது :

கோவை: கோவை கருமத்தம்பட்டி அருகேயுள்ள புதூர் சாலையில் நேற்று முன்தினம் இரவு போலீஸார் வாகன சோதனையில் ஈடுபட்டிருந்தனர். அப்போது, ஒரே இருசக்கர வாகனத்தில் 4 பேர் வந்தனர். அவர்களை போலீஸார் தடுத்து நிறுத்தியபோது, இருவர் தப்பியோடிவிட்டனர். மற்ற இருவரைப் பிடித்து போலீஸார் விசாரணை நடத்தினர்.

இதில், அவர்கள் ஊஞ்சபாளையத்தைச் சேர்ந்த ரமேஷ்(24) , பல்லடத்தைச் சேர்ந்த அஜீத்பாண்டியன்(27) என்பது தெரியவந்தது. அவர்களிடம் ‘ஏர்கன்’ வகையிலான துப்பாக்கி இருந்தது. மேலும், இவர்கள் துப்பாக்கியைக் காட்டி மிரட்டி, பணம் பறிக்க முயன்றதும் தெரியவந்தது. இதையடுத்து, இருவரையும் கைது செய்த போலீஸார், தலைமறைவான மற்றவர்களைத் தேடி வருகின்றனர்.