பேரறிவாளன் உள்ளிட்ட 7 பேர் விடுதலை விவகாரம் காங்கிரஸ் நிலைப்பாடு கூட்டணியை பாதிக்காது தமிழக காங்கிரஸ் தலைவர் கே.எஸ்.அழகிரி உறுதி

தமிழக காங்கிரஸ் தலைவர் கே.எஸ்.அழகிரி சென்னையில் செய்தியாளர்களிடம் நேற்று கூறியதாவது:

பண மதிப்பு நீக்க நடவடிக்கையை பிரதமர் மோடி அறிவித்து இன்றுடன் (நேற்று) 4 ஆண்டு நிறைவு பெறுகிறது. பணமதிப்பு நீக்கத்தால் மோடி அரசு கூறியதுபோல கறுப்புப் பணமும் ஒழியவில்லை. தீவிரவாதமும் ஒழியவில்லை.

ஜனநாயகம், மதச்சார்பின்மை என்ற கொள்கையில் உறுதியுள்ள கட்சிகள் திமுக கூட்டணியில் உள்ளன. இக்கூட்டணியில் கருத்து சொல்லும் சுதந்திரம் உள்ளது. 7 பேர் விடுதலையில் காங்கிரஸின் கருத்தால் திமுக கூட்டணியில் எந்த பிரச்சினையும் இல்லை.

ஆயிரக்கணக்கான தமிழர்கள் பல ஆண்டுகளாக சிறையில் உள்ள நிலையில், இந்த 7 பேரை மட்டும் தமிழர்கள் மட்டும் என்று அழைத்து சலுகை கேட்பது ஏன் என்பது தெரியவில்லை. அந்த 7 பேரையும் நீதிமன்றம் விடுவித்தால் நானே சென்று வரவேற்பேன். ஆனால், அதற்காக அரசியல் அழுத்தம்கொடுப்பதையே எதிர்க்கிறோம்.

மக்களை பாதிக்கும் பிரச்சினைகளில் இருந்து திசை திருப்புவதற்காக பாஜக வேல் யாத்திரை நடத்துகிறது. எந்த யாத்திரை நடத்தினாலும் தமிழகத்தில் பாஜக வளராது.

இவ்வாறு அவர் கூறினார்.