

பார்வையற்றோரும் பார்வைக் குறைபாடு கொண்டோரும் தங்களைச் சுற்றியுள்ள உலகை அறிந்துகொள்ளவும், அன்றாடப் பணிகளைச் சுயமாக மேற்கொள்ளவும் உதவும் இலவசச் செய்யறிவுச் செயலிதான் ‘Microsoft Seeing AI’. மைக்ரோசாஃப்ட் நிறுவனத்தால் உருவாக்கப்பட்டுள்ள இந்தச் செயலி, திறன்பேசி கேமரா மூலம் எழுத்துகள், பொருள்கள், நபர்கள், சுற்றுப்புறக் காட்சிகள் உள்ளிட்டவற்றை அடையாளம் கண்டு, அவற்றைக் குரல் வழியாக விவரிக்கிறது.
கணினிப்பார்வை (Computer Vision), இயந்திரக் கற்றல், ஒளி எழுத்துணர்தல் (OCR) போன்ற தொழில்நுட்பங்களைப் பயன்படுத்தும் இந்தச் செயலி, பார்வைத்திறன் சவால் கொண்டவர்களுக்குத் தேவைப்படும் பல்வேறு வசதிகளைத் தன்னுள் கொண்டுள்ளது.
எழுத்துகளையும் ஆவணங்களையும் வாசித்தல்
புத்தகங்கள், செய்தித்தாள்கள், உணவுப் பட்டியல், அறிவிப்புப் பலகைகள், அச்சிடப்பட்ட ஆவணங்கள் ஆகியவற்றில் உள்ள எழுத்துகளை இந்தச் செயலி வாசித்துக் காட்டுகிறது. ஆவணங்கள், PDF கோப்புகள் ஆகியவற்றோடு குறிப்பிட்ட சில மொழிகளில் உள்ள கையெழுத்துப் பிரதிகளையும்கூட அடையாளம் காண இது உதவுகிறது.
நபர்களை அடையாளம் காணுதல்
கேமராவைப் பயன்படுத்திப் படம் எடுத்து அதில் இருக்கும் நபர்களை அடையாளம் காணலாம். மேலும் இந்தச் செயலி, கேமராவில் காணப்படும் நபர்களின் தோற்றம், தோராயமான வயது, முகபாவனைகளைச் செய்யறிவு மூலம் விவரிக்கிறது. இருப்பினும், இவை கணிப்புகள் என்பதால் அனைத்துச் சூழல்களிலும் துல்லியமாக இருப்பதில்லை.
பொருள்களையும் பார்கோடுகளையும் அடையாளப்படுத்துதல்
கேமராவில் படம் பிடிக்கப்படும் காட்சியில் உள்ள பொருள்களையும் சூழலையும் இந்தச் செயலி விவரிக்கிறது. கடைகளில் உள்ள பொருள்களின் பார்கோடுகளை ஸ்கேன் செய்து அவற்றின் பெயரையும் தயாரிப்பு விவரங்களை அறியலாம். பார்கோடு இருக்கும் இடத்தைக் கண்டறிய ஒலி வழிகாட்டுதலும் உள்ளது.
நாணயம், நிறம், வெளிச்ச அளவைக் கண்டறிதல்
இந்திய ரூபாய் உள்ளிட்ட பல்வேறு நாடுகளின் நாணயத் தாள்களை அடையாளம் கண்டு அவற்றின் மதிப்பைத் தெரிவிக்கிறது. துணிகள் அல்லது பொருள்களின் நிறங்களைக் கண்டறிவதற்கும் இந்தச் செயலியைப் பயன்படுத்தலாம். மேலும், சுற்றுப்புற வெளிச்சத்தின் அளவுக்கு ஏற்ப ஒலியின் சுருதியை (Pitch) மாற்றுவதன் மூலம் அறையில் வெளிச்சம் உள்ளதா என்பதைப் பயனர்கள் அறிந்துகொள்ள உதவுகிறது.
கேள்விகள் கேட்கும் வசதி
‘Ask Seeing AI’ வசதியின் மூலம் புகைப்படங்கள், ஆவணங்கள் தொடர்பான கேள்விகளையும் கேட்கலாம். உதாரணமாக, உணவு அட்டவணையில் உள்ள இறைச்சி உணவு வகைகள் எவை என்றும், ரசீதில் குறிப்பிடப்பட்டுள்ள தொகை என்ன என்பதையும் அறிந்துகொள்ளலாம்.
தகவல்களை மீண்டும் பார்க்க
இந்தச் செயலியைப் பயன்படுத்திப் பகுப்பாய்வு செய்த புகைப்படங்களையும் ஆவணங்களையும் மீண்டும் பார்க்கும் வசதி உள்ளது. குறிப்பாக ஆண்டிராய்டு செயலியின் அண்மைய பதிப்பில், கடந்த 30 நாள்களில் ஆய்வு செய்யப்பட்ட ஒளிப்படங்களையும் ஆவணங்களையும் ‘History’ வசதி மூலம் மீண்டும் காணலாம்.
மொழி ஆதரவும் பயன்பாடும்
iOS, ஆண்டிராய்டு கருவிகளில் கட்டணமின்றிக் கிடைக்கும் இந்தச் செயலி, பல மொழிகளில் செயல்படுகிறது. ஆயினும், தமிழ் உள்ளிட்ட மொழிகளுக்கான வசதிகள் மிகக்குறைவாகவே உள்ளன. அத்துடன், இதிலிருக்கும் மேம்பட்ட செய்யறிவு சார்ந்த செயல்பாடுகளுக்கு இணைய இணைப்பு தேவைப்படக்கூடும்.
யாருக்குப் பயன்படும்?
பார்வையற்றோர், குறைந்த பார்வைத்திறன் கொண்ட முதியவர்கள், சிறப்புக் கல்வி ஆசிரியர்களுக்கு இந்தச் செயலி பயனுள்ளதாக இருக்கும். என்கிறபோதும், சாலையைக் கடத்தல் போன்ற உயிர்ப் பாதுகாப்பு தொடர்பான செயல்களுக்கு இந்தச் செயலியை மட்டுமே நம்பி இருக்கக் கூடாது.
தொழில்நுட்ப வளர்ச்சியின் உண்மையான வெற்றி, மனிதர்களின் வாழ்க்கையை மென்மேலும் மேம்படுத்துவதுதான். அதற்குச் செய்யறிவுச் செயலியான, ‘Microsoft Seeing AI’ மிகச்சிறந்ததொரு எடுத்துக்காட்டாக விளங்குகிறது. செயலியைத் தரவிறக்க: https://play.google.com/store/apps/details?id=com.microsoft.seeingai
செய்யறிவு விதி
புதிய AI கருவிகள் குறித்தும் அவற்றின் பயன்பாட்டு விதிகள் பற்றியும் தொடர்ந்து படியுங்கள். தொழில்நுட்பத்தைக் கற்றுக் கொண்டு, நம்மைப் புதுப்பித்துக் கொள்வது காலத்தின் கட்டாயம்.
- மேலும் கற்கலாம்.
- கட்டுரையாளர், பேராசிரியர், தொழில்நுட்ப எழுத்தாளர்.