தமிழகத்தைப் போலவே புதுச்சேரியிலும் தவெக-வுக்கு ‘விசில்’ சின்னம் ஒதுக்கப்பட்டுள்ளது. இதுகுறித்து மகிழ்ச்சி தெரிவித்துள்ள கட்சியின் தலைவர் விஜய், புதுச்சேரி மாநிலத்திற்கான புதிய நிர்வாகக் குழுவை நியமித்துள்ளார்.
இது குறித்து அவர் வெளியிட்டுள்ள அறிக்கையில் கூறப்பட்டுள்ளதாவது: புதுச்சேரி மாநிலத்தில் தவெக-வின் அன்றாடப் பணிகளையும் செயல்பாட்டையும் ஒருங்கிணைக்க, புதியதாக 30 பேர் கொண்ட நிர்வாகக் குழு நியமிக்கப்படுகிறது.
இதற்கு அனைவரும் முழு ஒத்துழைப்பு வழங்க வேண்டும். 2026 தமிழக சட்டப்பேரவை தேர்தலில் போட்டியிடும் தவெக-வுக்கு தேர்தல் ஆணையம் விசில் சின்னத்தை ஒதுக்கியிருக்கிறது. தற்போது புதுச்சேரி மாநிலத்திற்கும் அதே விசில் சின்னத்தைத் தேர்தல் ஆணையம் நமக்கு ஒதுக்கியிருக்கிறது.
நல்லதே நடக்கும்; வெற்றி நிச்சயம். இவ்வாறு தெரிவித்துள்ளார். தமிழகத்திலும் புதுச்சேரியிலும் முதல் தேர்தலிலேயே பொதுவான விசில் சின்னத்தில் தவெக போட்டியிட இருப்பது குறிப்பிடத்தக்கது.
