பிரதிநிதித்துவப் படம்
ராமநாதபுரம்: ராமநாதபுரத்தில் சிக்கிய ரூ.5 கோடிக்கும் மேலான மதிப்புள்ள தங்கம், கடத்தலில் தொடர்புடையதா, ஏராளமான நகைகளை போலீஸார் பதுக்கியுள்ளனரா என்ற சந்தேகங்களுடன் பல்வேறு தகவல்கள் வெளியாகி வருவதை போலீஸார் மறுத்துள்ளனர்.
ராமநாதபுரம் போதைப்பொருள் தடுப்பு தனிப்படை போலீஸார் செப்.18-ம் தேதி நள்ளிரவு பட்டணம்காத்தானில் 5 பேரை பிடித்தனர். அவர்கள் வைத்திருந்த பையில் ரூ.5 கோடி மதிப்புள்ள 3.800 கிலோ எடையுள்ள 38 தங்கக் கட்டிகள், 226.8 கிராம் நகைகள், ரூ.12.20 லட்சத்தை பறிமுதல் செய்தனர்.
கேணிக்கரை போலீஸார் நடத்திய விசாரணையில், அவர்கள் ராமநாதபுரம் குப்புசாமி, பரமக்குடி செல்வராஜ், தூத்துக்குடி பாலுகுட்டி என்ற சரவணன், மாரிமுத்து என்ற பூபதி, வேலாயுதம் ஆகியோர் எனத் தெரிய வந்தது.
இவர்கள் எம்ஜிஆர் நகர் அருகே குப்பைக் கிடங்கு பகுதியில் வந்தபோது கேட்பாரற்று கிடந்த பையில் தங்கக் கட்டிகள், நகை, பணம் இருந்தது எனக் கூறியதாக போலீஸ் தரப்பில் தெரிவிக்கப்பட்டது. இவர்களிடம் விசாரணை நடத்திய போலீஸார், நகைகள் கேட்பாரற்றுக் கிடந்ததுதான் என வழக்கு பதிந்து 5 பேரையும் விடுவித்தனர்.இந்தச் சம்பவம் குறித்து போலீஸார் ஊடகங்களுக்கு தகவல் தரவில்லை. இதனால் ஜோடிக்கப்பட்ட வழக்குபோல் சந்தேகம் ஏற்பட்டது.
இதற்கடையே சிக்கியது 25 கிலோ தங்கம் என்றும், இது தாமிரபரணி ஆற்றில் கண்டெடுக்கப்பட்டதாகவும், பெரும்பகுதி தங்கத்தை போலீஸார் பதுக்கிவிட்டதாகவும் தகவல் பரவியது. மேலும், கடத்தி வரப்பட்டபோது பிடிபட்டது என்றும் கடத்தல்காரர்கள் வேறு நபர்களைப் பயன்படுத்தி தங்கத்தைக் கைப்பற்ற நினைத்தபோது போலீஸில் சிக்கியதாகவும் பல தகவல்கள் சமூக ஊடகங்களில் வெளியாகின.
சில பவுன் தங்கத்தைக் கைப்பற்றினாலே பத்திரிகையாளர் சந்திப்பு நடத்தும் போலீஸார் ரூ.5 கோடி தங்கம் சிக்கியது குறித்து 5 நாட்களாக எந்த அறிவிப்பையும் வெளியிடாததும் சர்ச்சையை ஏற்படுத்தியது. சுங்கத் துறையும் எந்தத் தகவலையும் வெளியிடவில்லை.
இதற்கிடையே, நேற்று ராமநாதபுரம் மாவட்ட போலீஸ் தரப்பில் வெளியான அறிவிப்பில், கைப்பற்றப்பட்ட ரூ.5 கோடி மதிப்பிலான தங்கம், ரொக்கம் நீதிமன்ற உத்தரவின்பேரில் கருவூலத்தில் ஒப்படைக்கப்பட்டுள்ளன. கடத்தல் தங்கமா என விசாரணை நடத்த சுங்கத்துறை மற்றும் வருவாய் புலனாய்வு இயக்குநரகத்துக்கு விவரங்கள் அனுப்பப்பட்டுள்ளன. விசாரணை தொடரும் நிலையில், தவறான தகவல்களைப் பகிரவோ, வெளியிடவோ வேண்டாம் என கேட்டுக்கொள்வதாக தெரிவிக்கப்பட்டுள்ளது.
