சென்னை: சென்னை உயர் நீதிமன்றத்தில் புதிய நீதிபதிகளாக டி.லிங்கேஸ்வரன், பி.கார்த்திகேயன் ஆகியோர் நேற்று பதவியேற்றுக் கொண்டனர். அவர்களுக்கு தலைமை நீதிபதி எஸ்.ஏ.தர்மாதிகாரி பதவிப் பிரமாணம் செய்து வைத்தார்.
சென்னை உயர் நீதிமன்றத்துக்கு 15 பேரை புதிய நீதிபதிகளாக நியமிக்க மத்திய அரசுக்கு உச்ச நீதிமன்ற கொலீஜியம் பரிந்துரை செய்தது. இதில் முதல்கட்டமாக 13 பேரை நீதிபதிகளாக நியமித்து குடியரசுத் தலைவர் திரவுபதி முர்மு கடந்த ஆகஸ்ட் மாதம் உத்தரவிட்டார். அந்த பட்டியலில் இருந்த சென்னை தொழிலாளர் நல நீதிமன்ற முதன்மை நீதிபதி டி.லிங்கேஸ்வரன், சென்னை மாவட்ட முதன்மை அமர்வு நீதிபதி பி.கார்த்திகேயன் ஆகியோரை சென்னை உயர் நீதிமன்றத்தின் கூடுதல் நீதிபதிகளாக நியமித்து குடியரசுத் தலைவர் முர்மு கடந்த அக்.13-ம் தேதி உத்தரவிட்டிருந்தார்.
இந்நிலையில், சென்னை உயர் நீதிமன்றக் கலையரங்கில் இருவரும் நேற்று புதிய நீதிபதிகளாக பதவியேற்றனர். அவர்களுக்கு தலைமை நீதிபதி எஸ்.ஏ.தர்மாதிகாரி பதவிப் பிரமாணம் செய்து வைத்தார்.
விழாவில் புதிய நீதிபதிகளை வரவேற்றுப் பேசிய அரசு தலைமை வழக்கறிஞர் விஜய் நாராயண், “சென்னை உயர் நீதிமன்ற நீதிபதிகள் எண்ணிக்கை 67 ஆக உயர்ந்திருப்பது மகிழ்ச்சிக்குரியது. இதன்மூலம் நிலுவை வழக்குகளின் எண்ணிக்கை குறைந்து, நீதி பரிபாலனம் சிறக்க புதிய நீதிபதிகள் இருவரும் தங்களது சிறப்பான பங்களிப்பை வழங்குவார்கள். அவர்களுக்கு தகுந்த ஒத்துழைப்பு வழங்கப்படும்” என்றார்.
மத்திய அரசின் கூடுதல் சொலிசிட்டர் ஜெனரல் ஏஆர்எல் சுந்தரேசன், தமிழ்நாடு, புதுச்சேரி பார் கவுன்சில் தலைவர் செஞ்சி கே.கதிரவன், சென்னை உயர் நீதிமன்ற வழக்கறிஞர்கள் சங்கத் தலைவர் ஆர்.சி.பால்கனகராஜ், மெட்ராஸ் பார் அசோசியேஷன் தலைவர் வி.ஆர்.கமலநாதன், லா அசோசியேஷன் தலைவர் பி.செல்வராஜ், உயர் நீதிமன்ற பெண் வழக்கறிஞர்கள் சங்கத் தலைவர் என்.எஸ்.ரேவதி ஆகியோரும் வரவேற்றுப் பேசினர். பின்னர், புதிய நீதிபதிகள் இருவரும் ஏற்புரை வழங்கினர்.
நீதிபதி டி.லிங்கேஸ்வரன்: நெல்லை மாவட்டம் முதுமொத்தன்மொழியைச் சேர்ந்தவர். 1974 மே 10-ம் தேதி பிறந்தவர். சென்னை அம்பேத்கர் சட்டக் கல்லூரியில் சட்டப் படிப்பை முடித்து 2000-ம் ஆண்டு வழக்கறிஞராகப் பதிவு செய்தார். 2013-ல் மாவட்ட நீதிபதிகளுக்கான தேர்வில் வெற்றி பெற்ற இவர் கரூர், சென்னை உள்ளிட்ட பல்வேறு மாவட்டங்களில் நீதிபதியாக பணியாற்றியுள்ளார். இவரது மனைவி ஆர்.கீதா வழக்கறிஞராக உள்ளார்.
நீதிபதி பி.கார்த்திகேயன்: இவர் 1973 டிச.9-ம் தேதி பிறந்தவர். 1996-ம் ஆண்டு சட்டப் படிப்பை முடித்து வழக்கறிஞராக பதிவு செய்த இவர், 2013-ம் ஆண்டு மாவட்ட நீதிபதியாக தேர்வு செய்யப்பட்டு தருமபுரி, சென்னை உள்ளிட்ட மாவட்டங்களில் மாவட்ட நீதிபதியாகவும், மாநில சட்டத் துறை செயலராகவும் பணியாற்றியுள்ளார். இவரது தந்தை பாலதண்டாயுதம் இந்திய உணவுக் கழகத்தில் அதிகாரியாகப் பணியாற்றியவர். தாய் பி.ஜெயலட்சுமி. மனைவி என்.லட்சுமி.
