சென்னை: மதுராந்தகம் சட்டப்பேரவை தொகுதியில் திமுகவினர் பணப்பட்டுவாடா செய்வதாகவும், வெளியாட்களை கொண்டு வாக்காளர்கள் மிரட்டுவதாகவும் தமிழக தலைமை தேர்தல் அதிகாரி அர்ச்சனா பட்நாயக்கிடம் தவெக சார்பில் புகார் அளிக்கப்பட்டுள்ளது.
மதுராந்தகத்தில் திமுகவினர் பணப்பட்டுவாடா செய்வதாகவும் வாக்காளர்கள் மிரட்டப்படுவதாகவும் தவெக வழக்கறிஞர் அணி நிர்வாகி சங்கர் மனு அளித்துள்ளார்.
இதுகுறித்து செய்தியாளர்களிடம் அவர் கூறியதாவது: மதுராந்தகம் சட்டப்பேரவை தேர்தலில் தவெக பெரிய வெற்றிபெறும். இதனை பொறுத்துக் கொள்ள முடியாத திமுகவினர் தோல்வியைத் தவிர்க்கும் நோக்கில் தொகுதி முழுவதும் தங்களது பணபலத்தைப் பயன்படுத்தி அப்பட்டமாகப் பணப்பட்டுவாடாவில் ஈடுபட்டு வருகின்றனர்.
அதேபோல், தேர்தல் பிரச்சாரம் என்ற போர்வையில், வெளி மாவட்டங்களைச் சேர்ந்த திமுகவினர் மற்றும் தொண்டர்கள் பலர் குழுக்களாக பிரிந்து தொகுதி முழுவதும் இறக்கப்பட்டுள்ளனர். இவர்கள் தவெகவுக்கு ஆதரவாக இருக்கும் வாக்காளர்களைக் கண்டறிந்து, அவர்களை நேரடியாகச் சந்தித்து மிரட்டி வருகின்றனர்.
மேலும், மதுராந்தகம் தொகுதி 80 சதவீதத்துக்கும் மேல் கிராமப்புறப் பகுதிகளை உள்ளடக்கியதாகும். தற்போது தேர்தல் ஆணையம் அமைத்துள்ள வீடியோ கேமராக்கள் மற்றும் ரோந்து வாகனங்கள் அனைத்தும் பிரதான சாலைகளிலும், நகர்ப்புற பஜார் பகுதிகளிலும் மட்டுமே உள்ளது. உள்பகுதி கிராமங்களுக்குள் தேர்தல் பறக்கும் படையினரோ, நிலையான கண்காணிப்புக் குழுவினரோ செல்வதில்லை. இதனால் கிராமப்புற தனி வீடுகளுக்குச் சென்று நள்ளிரவில் பணப்பட்டுவாடா செய்யும் முயற்சிகள் தீவிரமாக நடந்து வருகின்றன.
எனவே, கிராமப் பகுதிகளில் கண்காணிப்பைத் தீவிரப்படுத்த வேண்டும் என தேர்தல் ஆணையரிடம் கேட்டுக்கொண்டோம். எங்கள் தரப்பில் தரப்பட்டுள்ள மனுவின் மீது உடனடியாக உரிய நடவடிக்கை எடுக்கப்படும் தேர்தல் ஆணையர் உறுதியளித்துள்ளார். இவ்வாறு அவர் கூறினார்.
